विराटनगर । जेनजी आन्दोलनमा अराजक समूहले आगो लगाउँदा १२० वर्षको राजनीतिक इतिहास बोकेको विराटनगरस्थित कोइराला निवासका अधिकांश सामग्री र संरचना खरानीमा परिणत भए । सोही निवासमा टेकेर राजनीतिको सुरुतात गर्नेदेखि लोकतन्त्रमा आस्था राख्नेहरु निवासको अवस्था हेर्न र बुझ्न दैनिकजसो भीड जम्मा भइरहेको छ । नेपाल विद्यार्थी संघका मोरङ जिल्ला सभापति सरोज पोखरेल भन्छन्, ‘भौतिक संरचना मरेको हो । तर लोकतन्त्रप्रति विश्वास, संघर्षको विचार र जनताको अधिकारप्रतिको चेतना कहिल्यै मर्दैन ।’ यो निवास नेपालका तीन प्रधानमन्त्री मातृकाप्रसाद, बीपी र गिरिजाप्रसाद कोइरालाको जन्मथलो मात्रै थिएन यो स्वतन्त्रता, लोकतन्त्र र समानताको आन्दोलनको जीवित प्रतिक थियो । नेतृ विजयता अधिकारी भन्छिन्, ‘आँखा अगाडि हाम्रो धरोहर खरानी भयो । प्रहरी र दमकल ढिलो आए । तर यो विचारलाई कसैले पनि खरानी बनाउन सक्दैन । त्यस्तै, पूर्वउपमेयर इन्दिरा कार्कीको मन भारी छ, ‘मन्दिर सरहको स्थल गुम्यो । तर हामीसँग अझै इतिहासको आत्मा बाँकी छ ।’ पूरानो संरचना पूर्ण रूपमा नष्ट भएपनि पछिल्लो भाग केही अंश बाँकी छ । यहाँ बस्दै आएका कांग्रेस नेता डा.शेखर कोइरालाले पुनर्निर्माण थालिसकेका छन् । तर, अझ ठूलो पुनर्निर्माण भने विश्वास र विचारलाई जोगाइराख्नुमा छ ।