रौतहट । रौतहटको चन्द्रपुर नगरपालिका वडा नम्बर ५, नहरको डिलमा एउटा झुपडी शैलीको घर छ । त्यही झुपडी भित्र १९ वर्षका विजय यादव विगत नौं महिनादेखि मृत्युसँग लडिरहेका छन् । गरिबीको चपेटामा परेको यो परिवारमा अहिले खुसी होइन, केवल आँसु र छटपटी मात्र छ ।
जयराम यादवका छोरा विजयको शरीर अहिले सुकेर अस्थिपञ्जर जस्तै भएको छ । मासु सुकेर करङका हड्डीहरू प्रस्टै देखिन थालेका छन् । हिँडडुल गर्न त परको कुरा, उनी ओछ्यानबाट उठ्न समेत नसक्ने गरी थलिएका छन् ।
विजयको व्यथा नौं महिनाअघि पेटको दुखाइबाट सुरु भएको थियो । बुबा जयरामले छोरालाई निको हुने आशमा चन्द्रपुरका विभिन्न अस्पतालहरू धाए । तर, नियति कस्तो भने अहिलेसम्म उनको रोग के हो भन्ने नै पत्ता लाग्न सकेको छैन ।
विभिन्न चिकित्सकले फरक-फरक रोगको शंका गरी धेरैथरीका औषधि खुवाइयो, तर कुनैले काम गरेन । उपचार नहुँदा रोग झन् बल्झिँदै गएर अहिले विजय ओछ्यानमै थुनिएका छन् ।
‘ठूलो र सुविधा सम्पन्न अस्पताल लैजानसके रोग पत्ता लाग्थ्यो कि, मेरो छोरा बाँच्थ्यो कि,’ जयराम भक्कानिँदै भन्छन् । ज्याला मजदुरी गरेर परिवार पाल्दै आएका जयरामलाई बिहान-बेलुकाको छाक टार्नै धौ-धौ छ । यस्तो अवस्थामा छोरालाई महँगो अस्पताल लैजाने कुरा उनका लागि एउटा अधुरो सपना जस्तै बनेको छ ।
छोराको रेखदेखका लागि कहिले बुबा त कहिले आमा घरमै बस्नुपर्छ । यसले गर्दा उनीहरूको कमाउने बाटो पनि बन्द भएको छ । घरमा खाने अन्न छैन, छोराको ओखती गर्ने पैसा त टाढाको कुरा ।
छोराको छटपटी देख्न नसकेर जयरामले सबैसामू हात फैलाएका छन् । ‘कसरी उपचार गरौं, म त गरिब मान्छे, कसैले मेरो छोरालाई बचाइदिए हुन्थ्यो,’ उनले भावुक हुँदै अपिल गरे ।
यदि समयमै उचित उपचार र खानपान पाए विजय फेरि आफ्नो खुट्टामा उभिन सक्थे । एउटा तन्नेरी छोरालाई आँखै अगाडि सुकेर मर्न लागेको देख्नुपर्ने बाबुको यो पीडा वर्णन गर्न सकिँदैन । विजयलाई अहिले आर्थिक र मानवीय सहयोगको खाँचो छ ।
थप समाचारहरु
मोतियाविन्दुका बिरामीको निः शुल्क उपचार गर्दै सगरमाथा आँखा अस्पताल
निजी अस्पतालमा मुख्यमन्त्री सिंहको अनुगमन
निजी अस्पताल अनुगमनमा मुख्यमन्त्री सिंह, गरुडाका १० अस्पताल बन्द गर्न निर्देशन
व्यवस्थापनमा सुधार गरिएसँगै जनकपुर अस्पतालमा दैनिक १२ सय बिरामीको उपचार
मधेस प्रदेशका स्वास्थ्यकर्मीको प्रर्दशन जारी
घरघरमै पुगेर उच्च रक्तचाप र मधुमेह परीक्षण
