काठमाडौं । सरकारले नेपाल धितोपत्र बोर्ड (सेबोन) को अध्यक्ष नियुक्तिका लागि सिफारिश समिति गठन गरेको छ । मंगलबार बसेको मन्त्रिपरिषद् बैठकले राष्ट्रिय योजना आयोगका उपाध्यक्ष डा. गुणाकर भट्ट को संयोजकत्वमा तीन सदस्यीय समिति गठन गरेको हो ।
सूचना, सञ्चार तथा प्रविधिमन्त्री विक्रम तिमिल्सिनाका अनुसार समितिमा अर्थ मन्त्रालयका सचिव घनश्याम उपाध्याय र भुवन दाहाल सदस्य रहेका छन् । समितिले धितोपत्र बोर्डको अध्यक्ष पदका लागि दरखास्त आह्वान गर्नेछ ।
धितोपत्र नियमावलीअनुसार अध्यक्ष पदका लागि आवेदन दिने उम्मेदवारको उमेर ३० वर्ष पूरा भई ६५ वर्ष ननाघेको हुनुपर्ने व्यवस्था छ । सिफारिश समितिले शैक्षिक योग्यता, अनुभव तथा उम्मेदवारले पेश गर्ने व्यावसायिक कार्ययोजनाको मूल्यांकन गर्नेछ । साथै, योग्य आवेदकहरू छनोट गरी अन्तर्वार्ता लिनेछ ।
धितोपत्र ऐनअनुसार समितिले तीन जनाको नाम छनोट गरी अर्थमन्त्रीसमक्ष सिफारिश गर्नेछ । त्यसपछि अर्थमन्त्रीको सिफारिशमा चार वर्षका लागि बोर्डको अध्यक्ष नियुक्त हुने व्यवस्था छ ।
अध्यक्ष बन्नका लागि पूँजी बजार, धितोपत्र बजार व्यवस्थापन, आर्थिक, वित्तीय, वाणिज्य, व्यवस्थापन वा कानुन क्षेत्रमा कम्तीमा सात वर्षको व्यावसायिक अनुभव आवश्यक पर्नेछ । साथै, कुनै राजनीतिक दलको सदस्य नभएको र धितोपत्र वा वस्तु विनिमय बजारसँग सम्बन्धित व्यवसायमा प्रत्यक्ष संलग्न नभएको स्व–घोषणा गर्नुपर्ने प्रावधान छ । यसअघि सेबोन अध्यक्ष सन्तोषनारायण श्रेष्ठले गत वैशाख ४ गते राजीनामा दिएपछि पद रिक्त रहेको छ । उनलाई केपी शर्मा ओली नेतृत्वको सरकारले २०८१ मंसिर १० गते अध्यक्षमा नियुक्त गरेको थियो ।
श्रेष्ठको नियुक्तिपछि उनको योग्यता सम्बन्धी विवाद उठेको थियो । कानूनअनुसार आवश्यक अनुभव नपुगेको भन्दै उजुरी परेपछि अख्तियार दुरुपयोग अनुसन्धान आयोग ले अनुसन्धान अघि बढाएको थियो । साथै, विभिन्न कम्पनीका आईपीओ स्वीकृतिमा बिचौलियामार्फत कमिशन मागेको आरोपसमेत लागेपछि आयोगले उनलाई बयानका लागि बोलाएको थियो ।
थप समाचारहरु
भगवती न्यौपाने संघीय मामिला तथा सामान्य प्रशासन मन्त्रीमा नियुक्त
एनसीसी अमेरिकाको सहमति कार्यान्वयन गराउन आरसी पराजुलीले गरे अपिल
एमालेको सचिवालय बैठक आज
राष्ट्रिय सभामा दाहालको प्रश्न जेनजी आन्दोलन परिवर्तन थियो कि वितण्डा मात्र ?
यस्ता छन् मन्त्रिपरिषद् बैठकका निर्णयहरु
चुनावी अभियानमा रास्वपाका नेता बालेन शाह तेह्रथुममा
