काठमाडौं । भारतका विदेश सचिव विक्रम मिस्रीको नेपाल भ्रमणको तयारी भइरहेका बेला अमेरिकी सहायक विदेशमन्त्री एस. पावल कपुर तीन दिने औपचारिक भ्रमणका लागि सोमबार नेपाल आउँदै छन् । परराष्ट्र मन्त्रालय स्रोतका अनुसार वर्तमान सरकार गठन भएयताको यो सबैभन्दा उच्चस्तरीय अमेरिकी भ्रमण हुनेछ ।
अमेरिकी राष्ट्रपति डोनाल्ड ट्रम्प निकट मानिने कपुरलाई ट्रम्प प्रशासनले तत्कालीन सहायक विदेशमन्त्री डोनाल्ड लुलाई हटाएर नियुक्त गरेको थियो । दक्षिण तथा मध्य एसियाली मामिला हेर्ने जिम्मेवारीमा रहेका कपुर भारतीय मूलका अमेरिकी अधिकारी हुन् । उनको जन्म भारतको दिल्लीमा भएको हो । उनका बुवा भारतीय र आमा अमेरिकी मूलकी हुन् ।
एस. पावल कपुर यसअघि अमेरिकी विदेश विभागको नीति योजना टोलीमा रहेर दक्षिण एसियाली मामिला हेर्थे । उनी अमेरिकी नाभल पोस्ट ग्राजुएट स्कुलमा प्राध्यापकसमेत रहिसकेका छन् । दक्षिण एसियाली सुरक्षा, आणविक रणनीति, भारत–पाकिस्तान सम्बन्ध र क्षेत्रीय सुरक्षाका विषयमा उनी जानकार मानिन्छन् ।
यसअघि तत्कालीन सहायक विदेशमन्त्री डोनाल्ड लु आफ्नो कार्यकालमा चार पटक नेपाल आएका थिए । नेपालमा एमसीसी कार्यान्वयन गराउनमा उनको महत्वपूर्ण भूमिका रहेको चर्चा हुँदै आएको छ । संसदबाट एमसीसी पारित हुनुअघि उनले नेपालमा उच्चस्तरीय भेटवार्ता गरेका थिए ।
कपुरको नेपाल भ्रमणलाई अर्थपूर्ण रूपमा हेरिएको छ । दक्षिण तथा मध्य एसियामा बढ्दो भूराजनीतिक प्रतिस्पर्धाका बीच नेपालको परराष्ट्र नीति र कूटनीतिक सन्तुलन फेरि चर्चामा आएको छ ।
भ्रमणका क्रममा कपुरले परराष्ट्रमन्त्री शिशिर खनालसहित उच्चस्तरीय नेताहरूसँग भेटघाट गर्ने कार्यक्रम छ । उनले क्षेत्रीय स्थिरता, सुरक्षा, सहकार्य र आपसी सम्बन्धका विषयमा नेपालसँग छलफल गर्ने बताइएको छ ।
थप समाचारहरु
भगवती न्यौपाने संघीय मामिला तथा सामान्य प्रशासन मन्त्रीमा नियुक्त
एनसीसी अमेरिकाको सहमति कार्यान्वयन गराउन आरसी पराजुलीले गरे अपिल
एमालेको सचिवालय बैठक आज
राष्ट्रिय सभामा दाहालको प्रश्न जेनजी आन्दोलन परिवर्तन थियो कि वितण्डा मात्र ?
यस्ता छन् मन्त्रिपरिषद् बैठकका निर्णयहरु
चुनावी अभियानमा रास्वपाका नेता बालेन शाह तेह्रथुममा
