रौतहट । गौरस्थित करदाता सेवा कार्यालय खारेज गरी त्यहाँका महत्वपूर्ण कागजात र फर्निचरका सामानहरू आन्तरिक राजस्व कार्यालय सिमरा (बारा) लैजान खोजिएपछि शुक्रबार गौरमा तनाव उत्पन्न भएको छ । ट्रकमा सामान लोड गरी लैजान खोज्दा स्थानीय उद्योगी, व्यापारी र राजनीतिक दलका प्रतिनिधिहरूले कडा अवरोध गरेपछि स्थिति तनावपूर्ण बनेको हो ।
शुक्रबार दिउँसो सुरक्षाकर्मीहरूको बाक्लो उपस्थितिमा कार्यालयका सामानहरू ट्रकमा लोड गरी सिमरा लैजान खोजिएको थियो ।
तर, जानकारी पाएलगत्तै पुगेका उद्योग वाणिज्य संघका पदाधिकारी र स्थानीयले सामान लैजान रोकेका थिए । अवरोधपछि सामानहरू पुनः कार्यालयमै फर्काइएको छ ।
कार्यालय हटाउन लागेको विरोधमा आक्रोशित व्यापारीहरूले गौर बजार पूर्ण रूपमा बन्द गराएका छन् । प्रदर्शनकारीहरूले घण्टाघर चोकमा टायर बालेर सडक अवरुद्ध गर्दै सरकारी कदमको विरोध गरिरहेका छन् ।
रौतहट उद्योग वाणिज्य संघका महासचिव सन्तोष केसरीले देश निर्वाचनमा होमिएको र सबैको ध्यान त्यता मोडिएको मौका छोपेर सुटुक्क सामान लैजान खोजिएको आरोप लगाए । विगतमा प्रमुख जिल्ला अधिकारीसँग भएको सहमति विपरीत कार्यालय सार्न लागिएको भन्दै आपत्ति जनाए ।
नेकपा एमालेका नेता एवं उम्मेदवार अजयकुमार गुप्ता र रास्वपा उम्मेदवार राजेश चौधरीले गौरको कार्यालय अन्यत्र लैजान नहुने र यस्तो गरिए कडा प्रतिवाद गर्ने चेतावनी दिएका छन् । स्थानीयले गौर करदाता सेवा कार्यालयलाई यथावत राख्न माग गर्दै आफ्नो आन्दोलन जारी राख्ने बताएका छन्।
थप समाचारहरु
सुरक्षाको दृष्टिकोणलाई मध्येनजर गर्दै ट्रेन बन्द
जनकपुरमा राष्ट्रिय झण्डासहित सात राजनीतिक दलको प्रदर्शन
बांगलादेशमा भएको हिन्दू युवाको हत्या प्रकरण : जनकपुरधाममा भोली विरोध र्याली निकालिने
शहीद परिवारका सदस्यहरुले दिए सशक्त आन्दोलनमा उत्रिने चेतावनी
कृषिलाई पहिलो प्राथमिकतामा राखेका छौँः मुख्यमन्त्री यादव
नेपाली कांग्रेसको मधेश सभा फागुन ६ गते, गगन थापाले सम्बोधन गर्ने
