काठमाडौं । दशैँको पहिलोदिन आज घटस्थापनाको अवसरमा काठमाडौंको बबरमहल स्थित दुर्गाबिनायक मन्दिरमा विशेष पूजापाठ गरी जमरा राखिँदै छ ।
यस मन्दिरका पुजारी कमल सापकोटाका अनुसार आज बिहान ९ बजेर १३ मिनेटमा जमरा राख्ने शुभ साइत रहेको छ । धार्मिक परम्परा अनुसार दुर्गा भगवतीलाई चढाउनका लागि जमरा राखिन्छ, जसलाई दशैँको आठ दिनको विशेष अवधीभर पूजा गरिन्छ । जमरा राख्नका लागि जौ, तिल, कुस, पातलगायत सामग्री प्रयोग गरिन्छ ।
विगत पाँच वर्षदेखि सो मन्दिरमा निरन्तर पुजारी सेवा गर्दै आएका सापकोटाले दशैँ नजिकिँदै गर्दा गाउँघरमा छुट्टै रमाइलो वातावरण हुने र टाढा टाढाबाट मानिसहरू आफ्ना घर फर्कने परम्परा रहेको बताए । उनका अनुसार दशैँमा आफूभन्दा ठूला व्यक्तिबाट टिका लगाउने प्रचलन रहँदै आएको छ, जसले स्नेह, आशीर्वाद र पारिवारिक एकतालाई बलियो बनाउँछ ।
यद्यपी, हालै मात्र नेपालमा भएको परिवर्तनकारी जेनजी आन्दोलनले निम्त्याएका हत्या, हिंसा, आगजनी र लुटपाटका दुखद् घट्नाले यसपटकको दशैँमा धेरैको घरमा रोधन समेत रहेको उनले बताए । भावुक हुँदै उनले भने,“कतिका छोराछोरी र कतिका आमाबाबुले ज्यान गुमाएका छन् । यसले गर्दा यो पर्व सबैका लागि रमाइलो मात्र नभई पीडादायी पनि भएको छ ।”
दशैँमा दुर्गा भगवतीको प्रसन्नताका लागि परम्पराअनुसार बोका बलि दिने चलन समेत रहँदै आएको पुजारी सापकोटाले बताए । यसरी बबरमहलस्थित दुर्गाबिनायक मन्दिरमा आज घटस्थापनाको अवसरमा पुजारीद्वारा शुभ साइतमा जमरा राखिँदैछ ।
थप समाचारहरु
भगवती न्यौपाने संघीय मामिला तथा सामान्य प्रशासन मन्त्रीमा नियुक्त
एनसीसी अमेरिकाको सहमति कार्यान्वयन गराउन आरसी पराजुलीले गरे अपिल
एमालेको सचिवालय बैठक आज
खानेपानी, जलस्रोत तथा सिँचाइ क्षेत्रमा दिगो र वैज्ञानिक प्रणाली अपनाउनु वर्तमान समयको आवश्यकता ः मन्त्री यादव
पूर्वउपाध्यक्ष भण्डारीले आज सम्पर्क कार्यालय उद्घाटन गर्दै
शिक्षक महासंघ पुनः आन्दोलनमा, पहिलो चरणको कार्यक्रम सार्वजनिक
