२९ फागुन, काठमाडौं । २३ दिन हिँडेर आई काठमाडौंमा आन्दोलनरत मिटरब्याज पीडितमध्ये कम्तीमा दुई सय जनालाई घर फर्किनसमेत समस्या भएको छ ।
मिटरब्याज तथा ठगीविरुद्ध किसान मजदुर संघर्ष समितिका अनुसार, प्रदर्शनरत ७ सय जना पीडितमध्ये आधाभन्दा बढी मंगलबारसम्ममा फर्किसकेका छन् । तर, कम्तीमा दुई सय जनालाई घर फर्किन भाडा तिर्ने पैसा समेत नभएपछि भृकुटीमण्डपमै रहेको संघर्ष समितिका प्रवक्ता निर्ग नवीनले बताए ।
सरकारले सोमबार राति सिंहदरबारमा मिटरब्याज पीडितसँग चार बुँदे सहमति गरेको थियो । सहमति अनुसार, नयाँ जाँचबुझ आयोग बन्नेछ, त्यसले अवैध रुपमा तयार गरिएका तमसुकहरु खारेज गर्न सिफारिस समेत गर्ने उल्लेख गरिएको छ ।
तर, सहमति भइसकेपछि पनि दुई सय जना अझै भृकुटीमण्डपमै छन् । ‘साँझसम्ममा व्यवस्थापन हुन्छ होला, अहिलेलाई पैसा म्यानेज भएकाहरु जति फर्किनुभयो’, निर्गले अनलाइनखबरसँग भने, ‘अरुलाई व्यवस्थापन गर्न प्रयास गरिरहेका छौं ।’
केही दिनअघि जिल्ला र नगरस्तरबाट आएका अगुवाहरु घर फर्किएका थिए । उनीहरुले धान बेचेर ल्याएको पैसाले कतिपय गाउँ फर्किएको अभियन्ताहरु बताउँछन् ।
पूर्वी तराई घर भएकाहरु अधिकांश फर्किइसकेका छन् । तर, पश्चिमतिर भाडा पनि बढी पर्ने भएकाले फर्किन समस्या भएको नवीनले बताए । उनका अनुसार, अभियन्ताहरुले अहिले बाँकी रहेकाहरुको विवरण संकलन गरिरहेका छन् ।
आफूहरुको समस्या समाधान नभएको भन्दै १६ माघमा पूर्वमा काँकडभिट्टाबाट अवधेश कुशवाह र पश्चिममा निर्ग नवीनको नेतृत्वमा मिटरब्याज पीडितहरु पैदल हिँडेर काठमाडौं आएका थिए ।
थप समाचारहरु
मिटरब्याज पीडितले गरे काठमाडौंमा खाली खुट्टै प्रदर्शन
मिटरब्याज पीडितहरुका समस्या चाँडो समाधान गरौं : ठाकुर गैरे
जसपालाई समेटेर मन्त्रिपरिषद् विस्तार गर्दै प्रचण्ड
आजको मौसमः केही प्रदेशको पहाडी भूभागका वर्षाको सम्भावना
संविधान संशोधन सबैदलको सहमतिमा हुन्छ : गृहमन्त्री लेखक
आजको मौसम : हिमाली क्षेत्रमा आंंशिक बदली रहने सम्भावना
