हतियार व्यवस्थापक सहित चारजना पक्राउ

१९ साउन, विराटनगर । विराटनगर महानगरपालिका ५ का रोहित चौधरी हत्यामा संलग्न भएको आरोपमा प्रहरीले चार जनालाई पक्राउ गरेको छ । यसअघि दुई जना पक्राउ परेका थिए ।

बिहीबार थप दुई जनालाई पक्राउ गरेको हो । रोहितको हत्यामा भने तीन जना संलग्न थिए । हत्यामा संलग्न गिरोहलाई हतियार उपलब्ध गराउने व्यक्तीलाई पनि पक्राउ गरेको जिल्ला प्रहरी कार्यालय सुनसरीका प्रहरी उपरीक्षक (एसपी) प्रभु ढकालले जानकारी दिए ।

पक्राउ पर्नेमा झापाको भद्रपुर नगरपालिका-१ घर भइ धरान-८ भोटेपुल बस्दै आएका ३० वर्षीय प्रकाश लिम्बू र विराटनगर महानगरपालिका-१५ का ४१ वर्षीय अज्जु भनिने अजयकुमार शर्मा छन् ।

चौधरीको हत्यामा संलग्न भएको आरोपमा प्रहरीले यसअघि लेटाङ नगरपालिका- १ का दीपक तिम्सिना र धरान १४ का अनसन तामाङलाई पक्राउ गरेको थियो ।

गत साउन ५ गते धनकुटाको मुलघाटबाट फर्कने क्रममा उनको धरान-इटहरी सडक खण्डको सेउती पुल नजिकै गोली हानी हत्या भएको थियो । हत्यामा तीन जना संलग्न थिए ।

प्रहरीका अनुसार विराटनगरका शर्मा बाहेक अन्य हत्या र लुटपाटमा संलग्न थिए । शर्माले भने गिरोहलाई भारतबाट हतियार व्यवस्था गरिदिएका थिए ।

गत साउन ५ गते २८ औं जन्मदिनको दिन घरमा मिठाई बाडेर उनी साथीसँग धनकुटाको मुलघाट पुगेका थिए । फर्कने क्रममा सेउती पुल दक्षिण तर्फ बाइक रोकेर पिसाब फेर्न गएको समयमा लेटेरा समूहले उनीसँगै रहेकी साथीलाई हतियार देखाएर लुटपाट गरेको थियो ।

लुटपाटको प्रतिकार गर्दा तिम्सिनाले चौधरीमाथि गोली प्रहार गरेका थिए । गोली लागेर घाइते भएका चौधरीको उपचारका क्रममा धरानस्थित वीपी कोइराला स्वास्थ्य विज्ञान प्रतिष्ठानमा मृत्यु भएको थियो ।

पक्राउ परेका तिम्सिना, तामाङ र लिम्बू मोरङको पथरीदेखि सुनसरीको चतरासम्मको उत्तरी जंगलको सडक खण्डमा भएका चारवटा लुटपाटका घटनामा संलग्न थिए ।

पक्राउ परेका तिम्सिना जबरजस्ती करणी मुद्धामा १० वर्ष कैद भुक्तान गरि दुई महिना अघि छुटेका हुन् । त्यसैगरि, तामांग लागु औषध मुद्धामा ६ महिना कैद भुक्तान गरि २ वर्ष अघि छुटेका अभियुक्त हुन् ।

थप समाचारहरु

जुवातास खेलिरहेको अवस्थामा विभिन्न स्थानबाट ९० जना पक्राउ नक्कली कागजपत्र बनाएर विदेश पठाउने काममा संलग्न अध्यागमन अधिकृतसहित ३२ जना पक्राउ नवलपरासी पश्चिममा सुन व्यवसायी विश्वकर्मामाथि गोली प्रहार सुन तस्करीमा मुछिएका कलेज सञ्चालक गुरुङ पक्राउ उपप्राध्यापक प्रेम चलाउनेलाई आक्रमण गर्ने एक जना पक्राउ पर्सामा श्रृंखलाबद्ध हत्या र डकैतीमा संलग्न अभियुक्त २५ वर्षपछि पक्राउ