काभ्रेपलाञ्चोक, ८ चैत । मन्त्रिरिषद्को निर्णयअनुसार नमोबुद्ध नगरपालिका र तेमाल गाउँपालिकामा प्रहरी चौकी निर्माणार्थ बिहीबार जग्गा हस्तान्तरण गरिएको छ ।
सरकारको नाममा कायम रहेको भोगचलनका ती दुई स्थानीय तहमा चौकी निर्माणार्थ दीर्घकालीन रूपमा जग्गाको प्रमाणपत्र हस्तान्तरण गरिएको हो ।
जिल्ला प्रशासन कार्यालयमा बिहीबार कार्यक्रम आयोजना गरी नमोबुद्धको मेथिनकोट र तेमालको पोखरी नारायणस्थानमा प्रहरी चौकी निर्माणका लागि छ–छ रोपनी जमिनको प्रमाणपत्र जिल्ला प्रहरी कार्यालयलाई दिइएको हो ।
प्रमुख जिल्ला अधिकारी उमेशकुमार ढकालले जिल्ला प्रहरी प्रमुख बसुन्धरा खड्कालाई उक्त प्रमाणपत्र हस्तान्तरण गरे । यही चैत ४ गते सरकारको निर्णयले दुई स्थानीय तहमा जग्गा उपलब्ध गराउने निर्णय भएको थियो ।
नमोबुद्ध नगरको भकुण्डेमा चौकी भवन निर्माणका लागि साविक मेथिनकोट–६ मा रहेको कित्ता नं ८५ को छ रोपनी तथा साविक पोखरीनारायणस्थान–३ तेमालका लागि ४६३ नम्बरको छ रोपनी जमिन दिने निर्णय गरिएको थियो ।
नमोबुद्ध–४ का वडाध्यक्ष अर्जुन कार्कीले बिपी राजमार्गमा सवारी आवागमनको चाप बढ्दै गएको तथा नगरको सहरी क्षेत्रमा बसोबास गर्नेको सङ्ख्या बढेको अवस्थामा सुरक्षामा थप व्यवस्थित हुने उद्देश्यले आवश्यक पर्ने पूर्वाधार निर्माणका लागि प्रहरीलाई जग्गा उपलब्ध गराउने निर्णय गरिएको जानकारी दिए ।
थप समाचारहरु
बोर्डद्वारा ‘इनडोर सुटिङ स्टुडियो’का लागि बोलपत्र आह्वान
‘बेरोजगारी समस्या, विदेसिनु बाध्यता’
उपत्यकामा ‘सेप्टिक ट्याङ्क’ अभियान चलाउनुपर्नेमा उपप्रधानमन्त्रीको जोड
प्रदर्शनीमा ढकमक्क रङ्गीचङ्गी फूल(तस्विरहरु)
न्युजिल्यान्डका उपप्रधानमन्त्री आज नेपाल आउँदै
युवा गैरसरकारी संस्था महासंघको नेतृत्वमा आन्दोलन सुरु, नागरिक अधिकार कुण्ठित गर्ने प्रस्तावप्रति आपत्ति
