रसुवा, २१ फागुन । सशस्त्र प्रहरी बलको टोलीले भन्सार छली लुकाईछिपाई केरुङ हुँदै चीनबाट ल्याइएका उपभोग्य वस्तु एवं लत्ताकपडा बरामद गरी स्थानीय टिमुरे भन्सार कार्यालयलाई बुझाएको छ ।
धुन्चेस्थित सशस्त्र प्रहरी बल २० नम्बर गुल्मले चीनतर्फबाट ल्याइएका चक्लेट, ओेखर, सस, टिमुरको तेल, जुत्ता तथा कपडालगायत सामग्री बरामद गरी भन्सार कार्यालय टिमुरेलाई बुझाएको हो ।
केरुङबाट रसुवागढी हुँदै बिक्रीका लागि काठमाडौँतर्फ लाँदै गरेको अवस्थामा ती सामान बरामद गरिएको हो । सशस्त्र प्रहरीले सार्वजनिक यातायातमा नियमित जाँच गर्ने क्रममा आज ती सामान बरामद गरी नियमानुसार भन्सार कार्यालयमा बुझाएको जनाएको छ ।
टिमुरे भन्सार कार्यालयका प्रमुख भन्सार अधिकृत तुलसीप्रसाद भट्टराईले नेपाल प्रहरी र सशस्त्र प्रहरी बलले बरामद गर्ने अवैध सामग्री नियमानुसार भन्सार कार्यालयमा बुझाउने गरेको बताए ।
बरामद गरिएका सामग्रीको गुणस्तर जाँच गराई खानयोग्यलाई लिलाम र गुणस्तरहीन सामग्रीलाई नष्ट गरिने व्यवस्था रहेको भन्सार अधिकृत भट्टराईले जानकारी दिए ।
लिलाम तथा नष्ट गराउने व्यवस्थाका लागि भन्सारमा छुट्टै अधिकारसम्पन्न एक समिति रहेको र सो समितिले गरेको निर्णयका आधारमा बरामदी सामग्रीको व्यवस्थापन गरिने कानुनी व्यवस्था रहेको भन्सार कार्यालयले स्पष्ट गरेको छ ।
थप समाचारहरु
नेपाल विश्वविद्यालयको कुलपतिमा डा.लोहनी चयन
‘स्थानीय उद्यमशीलताको विकास र रोजगारी सृजना अहिलेको अवश्यकता
‘केपी ओली कप २०८१’ आगामी फागुन ११ गते देखि सुरु हुँदै
निरोगी एवं समतामूलक समाज निर्माणका लागि प्रशिक्षक प्रशिक्षण
युवा, उद्यम र रोजगारी
जलवायु परिवर्तनले मानव जातिको अस्तित्वमा सङ्कट उत्पन्न गरेको छः प्रधानमन्त्री
