२९ साउन, काठमाडौं । डिउटीमा खटिएका नेपाल प्रहरीका हवल्दार अपहरणमा परेका छन् । सडकबाटै जर्बजस्ती गाडीमा राखेर अपहरण भएको हो ।
सिन्धुलीमा सडक खटिएका ट्राफिक प्रहरीका सहायक हवल्दार संदिप नारायण दासको भारतीय समूहबाट अपहरण भएको हो ।
जिल्ला प्रहरी कार्यालय, सिन्धुलीका अनुसार गत १२ साउनमा उनी कमलामाई नगरपालिका वडा नम्बर ४ स्थित हिरापानी चेकपोष्टमा मापसे चेकजाँचमा खटिएका थिए । बिआर २२ एपी ७३२१ नम्बरको भारतीय कार उनले मापसे जाँचका लागि रोकेका थिए । चेकजाँचको क्रममा विवाद भएपछि गाडीमा रहेका भारतीयले सहायक हवल्दार दासलाई जर्बजस्ती गाडीमा राखेर भागेका थिए । पछि सँगै डिउटीमा रहेका अन्य प्रहरीले मोटरसाइकलमा पछ्याएर करिब तीन सय मिटर टाढा सो गाडी रोकी प्रहरीको उद्धार गरेका थिए । गाडीमा रहेका पाँचै जनालाई अपहरण तथा शरिर बन्धक मुद्दामा कारबाही अघि बढाइएको सिन्धुलीका एसपी गोविन्दराज काफ्लेले बताए ।
पक्राउ पर्नेहरु बिहारको सीतामढिका बासिन्दाहरु छन् । उनीहरु नेपालमा धार्मिक भ्रमणमा आएका थिए । मदिरा पिएर उनीहरुले गाडी चलाएको समेत प्रहरीले जनाएको छ ।
