काठमाडौं । किलियन एमबाप्पे पेनाल्टीमा गोल गर्न असफल भएपछि रियल मड्रिड स्पेनिस ला लिगामा शुक्रबार राति रियल बेटिससँग १–० ले पराजित भएको छ ।
एक गोलले पछि परेको रियलले खेलको दोस्रो हाफको इन्जुरी टाइममा पेनाल्टीको अवसर पाएको थियो । तर एमबाप्पेको प्रहार बेटिसका गोलरक्षक अल्भारो भालेसले उत्कृष्ट बचाउ गर्दै रोकिदिए ।
बेटिसका लागि ट्रोय पाराटले ८१औँ मिनेटमा गरेको गोल नै निर्णायक बन्यो । पाराट ६८औँ मिनेटमा वैकल्पिक खेलाडीका रूपमा मैदान प्रवेश गरेका थिए ।
खेलको अन्त्यतिर बेटिसका नाथनले रियलका भिनिसियस जुनियरलाई पेनाल्टी एरियाभित्र फाउल गरेपछि रियलले पेनाल्टी पाएको थियो । तर एमबाप्पेको प्रहार भालेसले रोकेपछि बेटिसले महत्वपूर्ण तीन अंक हात पार्यो ।
यस सिजन रियलको यो पहिलो हार हो । जोसे मोउरिन्होको प्रशिक्षणमा सुरुवाती तीन खेल जित्दै उत्कृष्ट सुरुवात गरेको रियलको शतप्रतिशत जितको यात्रामा बेटिसले पूर्णविराम लगाएको हो ।
चौथो खेलमा तेस्रो जित निकालेको बेटिसले नौ अंक जोड्दै तालिकाको तेस्रो स्थानमा उक्लिएको छ । समान नौ अंक रहेको रियल गोल अन्तरका आधारमा दोस्रो स्थानमा छ ।
