काठमाडौं । फिफा विश्वकप २०२६ अन्तर्गत समूह ‘जी’ को पहिलो खेलमा बेल्जियमले सोमबार सिएटल स्टेडियममा इजिप्टसँग प्रतिस्पर्धा गर्दैछ । खेल नेपाली समयअनुसार राति १२ः४५ बजे सुरु हुनेछ।
बेल्जियमले आफ्नो पहिलो विश्वकप खेलअघि रक्षापंक्तिमा समस्याको सामना गरिरहेको छ । सेन्टर–ब्याक जेनो डेबास्ट खुट्टाको चोटका कारण मैदानबाहिर छन् ।
उनी टोलीसँगै भए पनि प्रतियोगिताको पछिल्लो चरणअघि खेल्ने सम्भावना कम छ ।
बेल्जियमले आक्रामक ४–२–३–१ संरचनामा खेल्ने अपेक्षा गरिएको छ । केभिन डे ब्रुयनको सिर्जनात्मक खेल र जेरेमी डोकुको तीव्र गतिले इजिप्टको रक्षालाई दबाबमा राख्ने अपेक्षा गरिएको छ ।
इजिप्ट भने पूर्ण रूपमा फिट टोलीसहित विश्वकपको पहिलो खेलमा उत्रँदैछ । स्टार खेलाडी मोहम्मद सलाह अप्रिलको अन्त्यतिर लागेको ह्यामस्ट्रिङ चोटबाट पूर्ण रूपमा निको भइसकेका छन् । उनले ब्राजिलविरुद्धको अभ्यास खेलमा ४५ मिनेट खेलेर आफ्नो फिटनेस प्रमाणित गरिसकेका छन् ।
बेल्जियम छनोट चरणभर अपराजित रहँदै विश्वकपमा पुगेको हो। तयारी खेलहरूमा पनि टोलीले उत्कृष्ट प्रदर्शन गर्याे । उसले क्रोएसियालाई २–० ले हरायो भने युनिसियालाई ५–० ले पराजित गर्यो ।
इजिप्टले पनि प्रभावशाली छनोट अभियानपछि विश्वकपमा स्थान बनाएको हो। अभ्यास खेलहरूमा उसले स्पेनसँग गोलरहित बराबरी खेलेको थियो भने रुसलाई १–० ले हराएको थियो।
