काठमाडौं । नेकपा एमालेका प्रचार तथा प्रकाशन विभाग प्रमुख निरज आचार्यले विपद्पछिको राहत वितरण भद्रगोल भएको बताएका छन् । उनले नदीपारिका नागरिक राहतको अभावमा भोकै बस्नुपर्ने तर नदीवारी राहत सामग्री कुहिएर गन्हाउने अवस्था देखिएको भन्दै राज्यको विपद् व्यवस्थापन प्रणालीप्रति प्रश्न उठाएका छन् ।
आचार्यले सामाजिक सञ्जाल फेसबुकमा लेख्दै सरकारले लागू गरेको भनिएको ‘एकद्वार प्रणाली’ प्रभावकारी रूपमा कार्यान्वयन भएको हो कि स्थानीय तथा प्रदेश सरकारप्रतिको अविश्वासका कारण सबै जिम्मेवारी नेपाली सेनालाई दिइएको हो भन्ने जिज्ञासा व्यक्त गरेका छन् ।
उनले विपद्का बेला नेपाली सेनालाई उद्धार तथा ज्यान बचाउने काममा केन्द्रित गर्नुपर्नेमा राहात वितरणको जिम्मेवारी दिनु उपयुक्त नभएको जनाए । सेनाको मुख्य जिम्मेवारी उद्धार हो कि राहत वितरण रु आचार्यले प्रश्न गरेका छन् ।
‘नेपाली सेनाको मुख्य काम विपद्मा ज्यान बचाउने हो कि चामल बाँड्ने,’ उनले लेखेका छन् ।
आचार्यका अनुसार सेनालाई उद्धार कार्यमा केन्द्रित गराएर राहत वितरणका लागि आम नागरिक, स्थानीय तह र प्रदेश सरकारको समन्वयमा छुट्टै टोली परिचालन गर्न सकिन्थ्यो । यस्तो व्यवस्थापन हुन सके राहत सामग्री थन्किएर कुहिने र विपद्पीडित नागरिक राहतको अभावमा बस्नुपर्ने अवस्था कम गर्न सकिने उनको भनाइ छ । उनले विपद् व्यवस्थापनमा राज्यका विभिन्न निकायलाई स्पष्ट जिम्मेवारी नदिँदा र व्यवस्थित प्रणाली निर्माण गर्न नसक्दा हरेकपटक समस्या दोहोरिने बताएका छन् ।
‘सबैलाई आ–आफ्नो जिम्मेवारी नदिने र सिस्टम नबनाउने हो भने सधैं यस्तै नियति भोग्नुपर्ने हो’ आचार्यले लेखेका छन् ।
थप समाचारहरु
पूर्वप्रधानमन्त्री हसिनाको कूटनीतिक राहदानी खारेज
‘केन्द्रीय तथ्यांक कार्यालयको सर्वेलाई आधारशिला बनाएर राष्ट्र बैंक अगाडि बढ्छ’
राष्ट्रिय वाणिज्य बैंकलाई अग्रणी बनाउने जोडमा अर्थमन्त्री पौडेलले
कति सिकियो त भूकम्पले सिकाएको पाठ
‘सबै क्षेत्र र भूगोललाई समेट्ने गरी बजेट निर्माणमा लागौँ’
युवाको आचरण र अनुशासन नै देशको ठूलो चुनौती : ओली
