मकवानपुर । हेटौँडामा एक व्यक्तिमाथि धारिलो हतियार प्रहार गरी गम्भीर घाइते बनाएको आरोपमा फरार रहेका एक अभियुक्तलाई जिल्ला प्रहरी कार्यालय मकवानपुरले पक्राउ गरेको छ ।
जिल्ला प्रहरी कार्यालय मकवानपुरका अनुसार हेटौँडा उपमहानगरपालिका–१० रानीमहलस्थित जय गणेश वर्कसपमा सुरक्षागार्डका रूपमा कार्यरत नुवाकोटको सूर्यगढी गाउँपालिका–१ निवासी ३२ वर्षीय रोहित तामाङमाथि मंगलबार राति करिब ११ः५५ बजे आक्रमण भएको थियो ।
प्रहरीका अनुसार हेटौँडा उपमहानगरपालिका–५ निवासी ३३ वर्षीय सविन नेपालीले तामाङलाई कुटपिट गर्नुका साथै शरीरका विभिन्न भागमा धारिलो हतियार (टाप) प्रहार गरेका थिए। उक्त आक्रमणबाट तामाङ गम्भीर घाइते भएका छन्। घटनालगत्तै अभियुक्त फरार भएका थिए।
घटनाको जानकारी प्राप्त हुनासाथ वडा प्रहरी कार्यालय हेटौँडाबाट खटिएको प्रहरी टोलीले तीव्र खोजतलास अभियान सञ्चालन गरेको थियो।
अनुसन्धान तथा सूचनाका आधारमा प्रहरीले बुधबार बिहान करिब २ बजे अभियुक्त सविन नेपालीलाई आफ्नै घरमा लुकिछिपी बसेको अवस्थामा नियन्त्रणमा लिएको जनाएको छ । पक्राउका क्रममा घटनामा प्रयोग भएको धारिलो हतियारसमेत बरामद गरिएको प्रहरीले जनाएको छ ।
पक्राउ परेका नेपालीविरुद्ध ‘ज्यान मार्ने उद्योग’ सम्बन्धी मुद्दा दर्ता गरी आवश्यक अनुसन्धान प्रक्रिया अघि बढाइएको छ । यसका लागि मकवानपुर जिल्ला अदालतबाट आठ दिनको म्याद थप अनुमति प्राप्त गरी थप अनुसन्धान भइरहेको जिल्ला प्रहरी कार्यालय मकवानपुरले जनाएको छ ।
