काठमाडौं । राष्ट्रिय सहकारी बैंकको अध्यक्षमा झापाका लक्ष्मीप्रसाद उप्रेती निर्वाचित भएका छन् । बिहीबार भएको सञ्चालक समितिको निर्वाचनमा कोशी प्रदेशबाट सञ्चालक रहेका उप्रेतीले आफ्ना प्रतिद्वन्द्वी परितोष पौड्याललाई पराजित गर्दै अध्यक्ष पदमा बाजी मारेका हुन् ।
सात सदस्यीय सञ्चालक समितिबीच भएको मतदानमा उप्रेतीले ५ मत प्राप्त गरे भने पौड्यालको पक्षमा केवल २ मत मात्र परेको थियो । झापाको नेपाल बहुउद्देश्यीय सहकारी संस्थाबाट बैंकमा प्रतिनिधित्व गरेका उप्रेती यसअघि बैंकको लेखा समिति संयोजकको रूपमा कार्यरत थिए । जेठ १३ गते सञ्चालकहरूले शपथ ग्रहण गरेलगत्तै अध्यक्ष चयनका लागि यो निर्वाचन प्रक्रिया अघि बढाइएको हो ।
बैंकको नयाँ कार्यसमितिमा सातवटै प्रदेशबाट प्रतिनिधित्व सुनिश्चित गरिएको छ, जसमा कोशीबाट उप्रेतीसहित मधेशबाट मन्दिरा आचार्य, बागमतीबाट परितोष पौड्याल, गण्डकीबाट कमला देवी गिरी, लुम्बिनीबाट विष्णुप्रसाद बराल, कर्णालीबाट कालीबहादुर महतारा र सुदूरपश्चिम प्रदेशबाट मनमोहन विष्ट सञ्चालक रहेका छन् । त्यस्तै, लेखा सुपरिवेक्षण समितिको संयोजकमा तारा गुरुङ तथा सदस्यहरूमा ममता शाह र युवराज पोखरेल चयन भएका छन् ।
संशोधित विनियमावली अनुसार बैंकको समितिमा कम्तीमा दुई जना महिलाको प्रतिनिधित्व अनिवार्य गरिएको छ भने आगामी दिनमा सञ्चालक समितिले थप दुई जना विज्ञ सञ्चालकहरू मनोनयन गर्ने व्यवस्था रहेको छ ।
थप समाचारहरु
सिन्धुपाल्चोक केन्द्रविन्दु भएर ६.१ रेक्टर स्केलको भूकम्प
सभापति देउवाद्वारा ग्याल्पो ल्होसारको शुभकामना सन्देश
राष्ट्रियसभाबाट पाँचवटै प्रतिस्थापन विधेयक बहुमतले पारित
खेर गएका मोबाइल सेट पुनःप्रयोगमा ल्याउने व्यवसाय फस्टाउँदो
कांग्रेसका नेताहरूले स्व.तीर्थराम डंगोलको जीवनबाट प्रेरणा लिनुपर्नेमा जोड
विद्युत महसुल नतिर्नेको धमाधम लाइन काट्दै गौर वितरण केन्द्र, ९ करोड ५५ लाख बक्यौता उठाउन कठोर
