७७ औँ स्थापना दिवसमा खनालको सन्देश : गल्ती सच्याउँदै आन्दोलन पुनर्निर्माण गरौँ

काठमाडौं । पूर्व प्रधानमन्त्री तथा नेपाली कम्युनिष्ट पार्टीका वरिष्ठ नेता झालनाथ खनालले नेपाली कम्युनिष्ट आन्दोलनको ७७औँ स्थापना दिवसको सन्दर्भमा पार्टी र आन्दोलनलाई पुनर्गठन गर्न आह्वान गरेका छन् ।
स्थापना दिवसको सन्दर्भमा एक विज्ञप्ति जारी गर्दै खनालले ७७ वर्ष लामो सङ्घर्षपछि देशमा संघीय लोकतान्त्रिक गणतन्त्र स्थापना भए पनि सामाजिक–आर्थिक रूपान्तरण, शिक्षा, स्वास्थ्य, प्रशासन र संस्कृतिमा अपेक्षित परिवर्तन हुन नसकेको बताए । जनताका आधारभूत आवश्यकता गाँस, बास, कपास, शिक्षा, स्वास्थ्य, रोजगारी र सुरक्षा सम्बोधन हुन नसक्दा व्यापक असन्तोष चुलिएको उनको भनाइ छ ।
खनालका अनुसार यही असन्तोषका कारण ठुलो सङ्ख्यामा जनता बिदेसिन बाध्य भएका छन् भने त्यसैको फाइदा उठाउँदै विभिन्न शक्तिहरूले आन्दोलनलाई दिशाहीन बनाएको आरोप लगाए । उनले हालको राजनीतिक अवस्थालाई गम्भीर रूपमा समीक्षा गर्नुपर्ने आवश्यकता औँल्याए ।
उनले विशेष गरी २०७४ को निर्वाचनमा उल्लेखनीय सफलता हासिल गरेको वामपन्थी शक्ति २०८२ को निर्वाचनमा उल्लेख्य रूपमा खुम्चिनु गम्भीर चिन्ताको विषय भएको बताए । यसका कारणहरूबारे गहिरो विश्लेषण नगरी आन्दोलनलाई नयाँ उचाइमा पु¥याउन नसकिने उनको निष्कर्ष छ ।
खनालले नेताहरूले कार्यकर्तामाथि दोष थोपर्ने प्रवृत्ति त्यागेर आफ्नै कमजोरी पहिचान गर्नुपर्नेमा जोड दिए । उनले आत्मालोचना गर्दै जनतासमक्ष प्रतिबद्धता जनाउन र पार्टीलाई वैचारिक, राजनीतिक, सङ्गठनात्मक तथा कार्यशैलीगत रूपमा रूपान्तरण गर्न आग्रह गरे ।
उनले बदलिएको राष्ट्रिय तथा अन्तर्राष्ट्रिय सन्दर्भमा नयाँ रणनीति तय गर्दै पार्टीलाई पुनर्गठन गर्नुपर्ने बताएका छन् । चुनौतीहरूका बिच अवसरहरू पनि प्रशस्त रहेको उल्लेख गर्दै उनले समाजवादको यात्रा अवरुद्ध नहुने विश्वास व्यक्त गरे ।
खनालले वर्तमान परिस्थिति अस्थायी भएको उल्लेख गर्दै समाजवादी लक्ष्य अन्ततः हासिल हुने दाबी गरे । उनले ‘समृद्ध नेपाल र सुखी नेपाली’ बनाउने लक्ष्य प्राप्ति सम्भव रहेको भन्दै सम्पूर्ण कम्युनिष्ट शक्तिलाई एकताबद्ध भएर अघि बढ्न आह्वान गरेका छन् ।

थप समाचारहरु

अझै ५ दिन गर्मी बढ्ने अनुमान, घर बाहिर ननिस्किन सुझाव

बजेट नसच्याए सरकार दुर्घटनामा पर्छ : माधव नेपाल

सूचना विभाग दर्ता नं.