निर्वाचन आयोगप्रति गरिएको टिप्पणीप्रति आयोगको आपत्ति

काठमाडौँ । निर्वाचन आयोगले एक टेलिभिजन कार्यक्रममा आयोग र कार्यवाहक प्रमुख निर्वाचन आयुक्तलाई जोडेर गरिएको टिप्पणीप्रति गम्भीर ध्यानाकर्षण भएको जनाएको छ ।

आयोगले सोमबार विज्ञप्ति गर्दै चैत १ गते कान्तिपुर टेलिभिजनमा प्रसारित सरोकार कार्यक्रममा राजनीतिक दलका जिम्मेवार व्यक्तिबाट गरिएको टिप्पणीप्रति आपत्ति जनाएको हो ।

आयोगका अनुसार उसले गर्ने सबै निर्णय नेपालको संविधान, प्रचलित कानुन तथा राजनीतिक दल सम्बन्धी ऐन २०७३ अनुसार हुँदै आएको छ । आयोगले नेपाली काँग्रेसको विशेष महाधिवेशनबाट निर्वाचित केन्द्रीय समितिका पदाधिकारी तथा सदस्यहरूको विवरण अभिलेखमा अद्यावधिक गर्दा पनि सोही कानुनी आधारमा निर्णय गरिएको जनाएको छ ।

विज्ञप्तिमा आयोगले उक्त निर्णयलाई सार्वजनिक सञ्चार माध्यममा अन्यथा अर्थ लगाएर टिप्पणी गर्नु विधिसम्मत नहुने उल्लेख गरेको छ । आयोगले असन्तुष्ट पक्षलाई कानुनी उपचार खोज्ने अधिकार रहेको र यस विषयमा परेको रिट निवेदनलाई सर्वोच्च अदालत नेपालले परीक्षण गर्ने बताएको छ ।

आयोगका प्रवक्ता सहसचिव नारायण प्रसाद भट्टराईले संवैधानिक निकायको निर्णय तथा अदालतमा विचाराधीन विषयमा निराधार टिप्पणी नगर्न सम्बन्धित पक्षलाई आग्रह गरेका छन् । साथै आयोगले आफ्ना काम कारबाहीबारे फैलाइएका कपोलकल्पित तथा निराधार विषयमा विश्वास नगर्न सबै सरोकारवालालाई अनुरोध गरेको छ ।