काठमाडौँ । झापाको गौरीगञ्ज गाउँपालिका स्थायी घर भएका ८५ वर्षीय रमेश घोषले आफ्नो जीवनका करिब ३५ वर्ष सडकपेटीमै बिताए। घर, परिवार र सम्पत्ति हुँदाहुँदै पनि नियतिको कठोर खेलले उनलाई सडक जीवनतर्फ धकेल्यो।
वि.सं. २०४५ साल भदौ ५ गते आएको विनाशकारी भूकम्पमा परी उनका बुबा–आमाले ज्यान गुमाए। संयोगवश रमेश र उनकी बहिनी भने त्यतिबेला घरबाहिर सुतेका कारण ज्यान जोगाउन सफल भए। तर उक्त घटनापछि उनको जीवनले फरक मोड लियो। परिवार बिखण्डित भयो र उनी विस्तारै सडक जीवनतर्फ धकेलिँदै गए।
रमेशले वि.सं. २०४५ सालदेखि २०८२ साल साउनसम्म सडकपेटीमै कष्टकर जीवन बिताएको पीडा सुनाउँछन्। ती वर्षहरूमा उनले न सुरक्षित बास पाए, न त भरपर्दो गाँस नै।
एक समय उनका नाममा ४ विघा १० धुर जग्गा, घरपरिवार र आफन्त थिए। तर दैविक प्रकोप र परिस्थितिको कठोर मोडले उनको जीवनको उर्वर समय सडकपेटीमै बित्न पुग्यो।
गत साउन ४ गते सर्लाहीको हरिवन नगरपालिका–११ स्थित सडकपेटीमा बेवारिसे अवस्थामा फेला परेपछि उनलाई मानवसेवा आश्रमले उद्धार गरी संरक्षणमा राखेको थियो। मानसिक रूपमा विक्षिप्त अवस्थामा रहेका उनलाई उद्धारपछि उपचार र हेरचाहसहित आश्रममा संरक्षण दिइएको छ।
विगत आठ महिनादेखि आश्रमले उनको उपचार र हेरचाहको जिम्मा लिँदै संरक्षणमा राखेको छ। हाल उनी मानवसेवा आश्रम रौतहट शाखामा सुरक्षित रूपमा बस्दै सम्मानजनक जीवनयापन गरिरहेका छन्।
थप समाचारहरु
न्याय सम्पादनमा राजनीतिक स्वार्थ देखिनहुन्नः मुख्यमन्त्री कार्की
ताप्लेजुङका स्थानीय तह याक प्रवर्द्धनमा जुट्दै
फड्के तर्ने क्रममा खोलामा खसेर बालिकाको मृत्यु
विद्यार्थीलाई अभ्यासमूलक व्यावहारिक शिक्षा दिँदै ‘यशोधरा’
देश विकासका लागि श्रमदान अपरिहार्य
इटहरीमा घुम्ती साहित्य उत्सव, गरियो कितावहरुको चर्चा
