काठमाडौं ५ लाई ‘मेडिकल हब’का रुपमा विकास गर्ने पौडेलको प्रतिबद्धता

काठमाडौं । नेपाली कांग्रेसका काठमाडौं क्षेत्र नम्बर ५ का उम्मेदवार प्रदीप पौडेलले सहज, सुलभ, गुणस्तरीय र प्रविधिमैत्री स्वास्थ्य प्रणाली निर्माण गर्ने प्रतिबद्धता व्यक्त गरेका छन् ।
उनले सोमबार आफ्नो चुनावी प्रतिज्ञापत्रमार्फत सबैलाई स्वास्थ्य बीमामा आवद्धता सुनिश्चित गर्दै यसलाई नागरिकको योगदानमा आधारित राष्ट्रिय गौरवको कार्यक्रम बनाइने र सुविधाको दायरासमेत वृद्धि गर्ने प्रतिबद्धता व्यक्त गरेका छन् ।
उनले नागरिकले बिरामी पर्दा ढुक्कसँग उपचार लिन पाउने वातावरण निर्माणका लागि आवश्यक नीति निर्माण तथा कार्यन्वयनमा उचित समन्वय गर्ने पनि बताएका छन् ।
प्रतिज्ञापत्रमा लेखिएको छ ,‘सबैका लागि स्वास्थ्य बीमामा आबद्धता सुनिश्चित गरि स्वास्थ्य प्रणालीलाई आधुनिक प्रविधिसँग जोड्दै थप व्यवस्थित, सहज र सुलभ बनाइनेछ। स्वास्थ्य बीमाको पुनर्संरचना गरी यसलाई नागरिकको योगदानमा आधारित राष्ट्रिय गौरवको कार्यक्रम बनाइनेछ र सुविधाको दायरा वृद्धि गर्दै नागरिकले बिरामी पर्दा ढुक्कसँग उपचार लिन पाउने वातावरण निर्माणका लागि आवश्यक नीति निर्माण तथा कार्यन्वयनमा उचित समन्वय गरिनेछ ।’
पौडेलले क्षेत्र ५ लाई मेडिकल हबका रुपमा विकास गर्दै लैजान निजी अस्पतालहरूसँग समेत सघन सहकार्य गर्ने बताए ।
क्षेत्रभित्रका त्रिवि शिक्षण अस्पताल, शहीद गगालाल राष्ट्रिय हृदय केन्द्र, कान्ति बाल अस्पताल तथा नेपाल प्रहरीजस्ता केन्द्रीय अस्पतालहरुको क्षमता थप विस्तार गर्ने उनले प्रतिबद्धता जनाएका छन् ।
‘यस क्षेत्रका त्रिवि. शिक्षण अस्पताल महाराजगञ्ज (टिचिङ), सहिद गङ्गालाल राष्ट्रिय हृदय केन्द्र, कान्ति बाल अस्पताल, नेपाल प्रहरी अस्पतालजस्ता केन्द्रीय अस्पतालहरूको स्वास्थ्य सेवा प्रवाहको क्षमता थप विस्तार गरिनेछ । क्षेत्र नं. ५ लाई मेडिकल हव को रूपमा विकास गर्दै लैजान निजी अस्पतालहरूसँग समेत सघन सहकार्य गरिने छ’प्रतिज्ञा पत्रमा भनिएको छ ।
तीनै तहका सरकारका स्वास्थ्य संरचनासँग सहकार्य गर्दै निशुल्क स्वास्थ्य शिविर र स्वस्थ जीवनशैलीका लागि जनचेतना विस्तार कार्यलाई निरन्तरता दिइने,स्थानीय तहसँग सहकार्यमार्फत शहरी स्वास्थ्य प्रवद्र्धन केन्द्रहरूको स्थापना तथा आवश्यक जनशक्ति, उपकरण र औषधिसहित थप सुदृढ बनाउने प्रतिज्ञापत्रमा उल्लेख छ ।

थप समाचारहरु

शिक्षा मन्त्रालयले त्रिवि जग्गा खोजबिन समितिको प्रतिवेदन सार्वजनिक गर्ने मन्त्री कुलमान घिसिङ र कोरियाका राजदूतबीच भेटवार्ता विशेष महाधिवेशनले एकताको सन्देश दिनेछ कांग्रेसले इतिहासको योगदानको ब्याज मात्र खाएर बसेर भविष्य बन्दैन : पूर्व उपसभापति श्रेष्ठ विशेष महाधिवेशन शक्ति वा सत्ताको संघर्ष होइन, सोचको लडाइँ हो : गगन थापा कांग्रेस केन्द्रीय कार्यसमिति बैठकको समय परिवर्तन