काठमाडौं । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले थारु समुदायको मुख्य पर्व माघी तथा समस्त हिन्दू, मगर, छन्त्याललगायत विभिन्न समुदायले मनाउने माघे संक्रान्ति (मकर संक्रान्ति) को अवसरमा सम्पूर्णमा शुभकामना व्यक्त गरेका छन्।
शुभकामना सन्देशमार्फत संयोजक प्रचण्डले माघी र माघे संक्रान्तिलाई नेपालको बहुजातीय, बहुभाषिक र बहुसांस्कृतिक समाजका जीवन्त पहिचानका रूपमा उल्लेख गर्दै यी पर्वहरूले विविधताभित्र एकता, आपसी सम्मान, भाइचारा र सामाजिक सद्भावको सन्देश दिने बताएका छन्।
उत्तरायणको सुरुवातसँगै दिन लम्बिँदै र रात छोटिँदै जाने प्रक्रियाजस्तै देशको राष्ट्रिय जीवनमा पनि अन्धकार हटेर उज्यालो, प्रगति र समृद्धिको नयाँ युग सुरु होस् भन्ने कामना उनले गरेका छन्।
उनले तराई, पहाड र हिमालका नेपालीहरू परिवारजनसँगै बसेर खिचडी, घिउ, चाकु, तरकारीलगायत परिकार साटासाट गर्दै आपसी सुख–दुःख बाँड्ने परम्पराले समाजलाई थप सुदृढ बनाउने उल्लेख गरेका छन्।
शुभकामना सन्देशमा प्रचण्डले यो पर्वले अझ बढी मेहनत गर्न, एकजुट हुन र राष्ट्र निर्माणको जिम्मेवारी इमानदारीपूर्वक वहन गर्न प्रेरणा दिने विश्वास व्यक्त गरेका छन्। साथै, संविधानको पूर्ण कार्यान्वयन, राष्ट्रिय एकता, शान्ति, सुशासन र समृद्ध नेपालको सपना साकार पार्न सबै मिलेर अघि बढ्न आह्वान गरेका छन्।
थप समाचारहरु
हामी निर्वाचनमा जान तयार छौं तर सरकार तयार छैन् : सन्तोष परियार
विप्लव नेतृत्वको नेकपा समाजवादी मोर्चाबाट अलग
मधेश प्रदेश सरकारमा अस्थिरता ल्याउने काममा जनमत पार्टी प्रमुख कारक हो :
‘युवा पुस्तालाई मतदानको अवसर प्रदान गर्न मतदाता नामावली ऐन संशोधन गरिएको हो
जेनजी पुस्ताले उठाएको मुद्दा रास्वपाले पहिल्यै उठाएको हो : कविन्द्र वुर्लाकोटी
निर्वाचन ७१ दिन बाँकीः चुनावी गतिविधि तीव्र, समानुपातिकतर्फको बन्द सूची तयार पार्दै दलहरु
