काठमाडौँ ।मानवसेवा आश्रमका सबै शाखाहरूले हरेक शनिबार नियमित रूपमा रात्रिकालीन सडकसेवा सञ्चालन गर्दै आइरहेका छन्। यसै क्रममा शनिबार राति सञ्चालन गरिएको सडकसेवामार्फत १० जना सहयोगापेक्षी व्यक्तिहरूको उद्धार गरिएको छ।
उद्धार गरिएकामध्ये रानीवन शाखाबाट ४ जना, विराटनगर शाखाबाट २ जना तथा मुख्य कार्यालयअन्तर्गत हेटौँडा, सर्लाही, लमजुङ र नेपालगञ्ज शाखाबाट १–१ जना गरी जम्मा १० जनाको उद्धार गरिएको हो।
हरेक शनिबार राति ८ बजेदेखि १० बजेसम्म सञ्चालन हुने रात्रिकालीन सडकसेवामा आश्रमका अभियन्ता, कर्मचारी, स्थानीय जनप्रतिनिधि, सरोकारवाला निकाय, स्वयंसेवक तथा अभिभावकहरूको सक्रिय सहभागिता रहने गरेको छ। कठ्याङ्ग्रिदो जाडोमा खुला सडकपेटी तथा सार्वजनिक स्थलहरूमा अलपत्र अवस्थामा रहेका व्यक्तिहरूको अवस्था अवलोकन गरी वास्तविक सहयोगको आवश्यकता परेकाहरूको पहिचान गर्दै उद्धार गरिँदै आएको छ।
विभिन्न परिस्थितिका कारण सडक जीवन बिताउन बाध्य भएका तथा पारिवारिक साथबाट वञ्चित भएका बेवारिसे व्यक्तिहरूलाई उद्धार गरी आश्रमले सम्मानपूर्वक जीवनयापन गर्न सुरक्षित वातावरण उपलब्ध गराउँदै आएको छ।
मानवसेवा आश्रमले खुला सडकपेटी तथा सार्वजनिक स्थलहरूमा कष्टपूर्ण जीवन बिताउन बाध्य बेसहारा, असहाय, अशक्त, अभिभावकविहीन तथा शारीरिक र मानसिक रूपमा कमजोर व्यक्तिहरूको उद्धार, उपचार, पालनपोषण, संरक्षण एवं पारिवारिक पुनर्मिलन गर्दै सेवा प्रदान गरिरहेको छ। आश्रमले २०८२ भित्रै मुलुकलाई सहयोगापेक्षी सडकआश्रित मानवमुक्त राष्ट्र घोषणा गर्ने लक्ष्यसहित उद्धार अभियानलाई अझ तीव्र बनाएको छ।
थप समाचारहरु
सुरक्षित कारोबार विधेयकमा रहेको ‘सामान्य’ शब्द हटाउन माग
‘अहिले हाम्रो सरदर आयु ७२ वर्ष किन पुगेको छ हामीले बालमृत्यु दर घटाइदियौँ
राष्ट्रपति पौडेलसँग राष्ट्रिय फोटो पत्रकार समूहको भेट
यस्तो छ, आजको विदेशी मुद्राको विनिमयदर
खाद्य सुरक्षाका लागि मलखादमा ६६ प्रतिशतसम्म अनुदान : मन्त्री अधिकारी
उपराष्ट्रपति यादव र फ्रान्सेली राजदूतबीच शिष्टाचार भेटवार्ता
