तिलोत्तमा । सडकपेटीबाट अलपत्र अवस्थामा उद्धार गरी मानवसेवा आश्रम तिलाेत्तमा शाखाको संरक्षणमा राखिएका २० वर्षीय हमी दुल्लाह मुसलमानको मंगलबार सुखद् पारिवारिक पुनर्मिलन सम्पन्न भएको छ।
मानसिक रूपमा कमजोर अवस्थामा उद्धार गरिएका हमी दुल्लाहको आश्रम बसाइँका क्रममा आवश्यक उपचार, हेरचाह तथा पुनर्स्थापनाका लागि प्रकृिया अघि बढाइएको थियो। उपचारसँगै पारिवारिक पुनर्मिलनका लागि गरिएको खोजी तथा पहलका क्रममा परिवार मानवसेवा आश्रमको सम्पर्कमा आएपछि पुनर्मिलन सम्भव भएको हो।
आश्रममा ३ महिना १० दिनसम्म संरक्षणमा रहेका हमी दुल्लाहका लागि आवश्यक सम्पूर्ण प्रक्रिया पूरा गरी मंगलबार उनलाई परिवारको जिम्मा लगाइएको मानवसेवा आश्रमले जनाएको छ।
मानवसेवा आश्रमले सरकारको आंशिक सहयोग तथा देश–विदेशमा बसोबास गर्ने दाताहरूको निरन्तर सहयोग र सद्भावका कारण देशभर २९ वटा शाखा विस्तार गरी सहयोगापेक्षी व्यक्तिहरूलाई सेवा प्रदान गर्दै आइरहेको छ।
