खाँदबारी सङ्खुवासभा, ३ पुसः सङ्खुवासभाको पाँचखपन नगरपालिका–६ का किसान भीमकुमार थापालाई धान उत्पादनमा उल्लेखनीय उपलब्धि हासिल गरेबापत सम्मान गरिएको छ । चालु आर्थिक वर्षमा ६० मुरीभन्दा बढी धान उत्पादन गर्न सफल भएका उनलाई नगरपालिकाभित्र सबैभन्दा बढी उत्पादन गर्ने किसानका रूपमा सम्मान गरिएको हो ।
आज यहाँ आयोजित कार्यक्रममा पाँचखपन–६ का वडाध्यक्ष विष्णु श्रेष्ठले थापालाई नगद रु ३० हजारसहित सम्मानपत्र प्रदान गरे । यहाँका किसानलाई सहज रूपमा खेती गर्ने वातावरण सिर्जना गर्दै उत्पादनमा आधारित प्रोत्साहन कार्यक्रम लागू गरिएको उनले जानकारी दिए ।
किसानको मेहनतलाई सम्मान नगरी कृषि क्षेत्रको दिगो विकास सम्भव नहुने उल्लेख गर्दै उनले यस्ता पुरस्कारले अन्य किसानलाई पनि व्यावसायिक खेतीतर्फ प्रेरित गर्ने विश्वास व्यक्त गरे ।
किसान थापाले परम्परागतखेती प्रणालीलाई सुधार गर्दै आधुनिक प्रविधि, उन्नत जातका बीउ, समयमा मलखादको प्रयोग, नियमित सिँचाइ व्यवस्थापन, निरन्तर मेहनतलगायत कारणले बढी उत्पादन सम्भव भएको बताए । सफलताका लागि परिवारको साथ, स्थानीय सरकारको सहयोग र निरन्तर परिश्रम प्रमुख कारण भएको उनको भनाइ छ ।
थापाको सफलताबाट सिकेर यहाँका कतिपय किसानले धानखेतीलाई व्यावसायिक रूपमा अगाडि बढाउन थालेका वडाध्यक्ष श्रेष्ठले बताए। स्थानीय सरकारले किसानलाई सम्मान र प्रोत्साहन दिने नीति अवलम्बन गरेसँगै कृषि क्षेत्रमा आत्मनिर्भरता हासिल गर्न सकिने किसानको विश्वास छ ।
पाँचखपन–६ ले आगामी दिनमा पनि उत्पादनमा आधारित अनुदान, किसानलाई सम्मान, तालिम, बीउ तथा प्रविधि सहयोगलगायत कार्यक्रमलाई निरन्तरता दिने जनाएको छ ।
थप समाचारहरु
आदिवासी जनजातिको अधिकार विभिन्न नाममा खोस्ने प्रयत्न भइरहेको छ
भारतीय पूर्वप्रधानमन्त्री डा.मनमोहन सिंहको निधन
पूर्वप्रधानमन्त्री मनमोहन सिंहलाई अन्तिम श्रद्धाञ्जली
चैत्र शुक्ल प्रतिपदाः सिद्धार्थी नामक संवत्सर सुरु
कञ्चनजङ्घा आरोहणको ७० वर्ष : हीरक महोत्सवको तयारी
संवैधानिक परिषद्लाई अनिर्णयको बन्दी बनाउन हुँदैन : मन्त्री गुरुङ
