मुस्ताङ र बागलुङमा फलफूल चिस्यानगृह निर्माण

म्याग्दी, १२ भदौः म्याग्दी, मुस्ताङ, बागलुङ र पर्वत जिल्लामा सञ्चालित राष्ट्रिय कृषि आधुनिकीकरण परियोजनाको सहयोगमा दुई वटा फलफूल चिस्यानगृह निर्माण भएका छन् ।

परियोजनाले रु १५ लाखको लागतमा बागलुङ नगरपालिका–१० भकुण्डे र मुस्ताङको वारागुङ मुक्तिक्षेत्र गाउँपालिका–१ झारकोटमा त्यति नै रकम खर्चेर चिस्यानगृह निर्माण गरेको हो । दुवै चिस्यानगृहमा १० मेट्रिक्टन फलफूल भण्डारण गर्न सकिने परियोजनाका कृषि अधिकृत विक्रम बस्यालले बताए । म्याग्दी, मुस्ताङ, बागलुङ र पर्वतमा प्रशस्त स्याउ र सुन्तला उत्पादन हुने भएकाले प्राथमिकताका साथ चिस्यानगृह निर्माण गरिएको हो ।

परियोजनाले रु। आठ लाख अनुदान दिएर पर्वतको जलजला गाउँपालिका–१ बाँसखर्कमा सुन्तला सङ्कलन केन्द्र निर्माण गरेको छ । परियोजनाका अनुसार बेनी, बागलुङ नगरपालिका, काठेखोला, मङ्गला, रघुगङ्गा, अन्नपूर्ण र जलजला गाउँपालिकामा सुन्तला, मुस्ताङको २२ वटा वडामा स्याउ, म्याग्दीको छ वटै पालिकामा बङ्गुर, मुस्ताङको लोमान्थाङ, लोघेकर दामोदरकुण्ड र वारागुङ मुक्तिक्षेत्र गाउँपालिकामा च्याङग्रा जोन लागू भएको छ । यसैगरी म्याग्दीको अन्नपूर्णको सबै वडा, रघुगङ्गाका वडा ५, ६, ७, ८ र बेनी नगरपालिकाको १० नम्बर वडा मुस्ताङको सबै क्षेत्रमा आलु जोन लागू भएको छ ।

सुन्तला, स्याउ, आलु, च्याङग्रा र बङ्गुरको व्यावसायिक पालनका साथै कृषि उत्पादन तथा प्रशोधन केन्द्र जोन कार्यक्रम लागु भएका स्थानका किसानलाई चिस्यानगृह, फलफूल प्रशोधन, कृषि उपकरण, साना सिँचाइ, नर्सरी स्थापना, गोठ सुधारका लागि गत आर्थिक वर्षमा रु। दुई करोड ९२ लाख १६ हजार अनुदान वितरण गरेको कृषि अधिकृत बस्यालले बताए।

थप समाचारहरु

स्थानीय भन्छन् : ज्यान त बच्यो, हेर्दा हेर्दै घरबारविहीन भयौँ झोलुङ्गे पुलको जिल्लामा पनि ‘फड्के’को बाध्यता पोखराबाट ‘स्कुल ड्रेस’मा एकैदिन हराए ३ बालिका बाढीले झोलुङ्गे पुलमा क्षति पुर्‍याउँदा किसानलाई समस्या सामूहिक बलात्कार आरोपमा स्याङ्जामा दुई जना पक्राउ उपल्लो मुस्ताङका बासिन्दालाई चीन जान अनुमतिपत्र