काठमाडौं । वीरगञ्जमा हैजाको सङ्क्रमण बढेर १ सय १४ पुगेको छ ।
स्वास्थ्य कार्यालय पर्साका जनस्वास्थ्य अधिकृत जयमोद ठाकुरका अनुसार मंगलबार रातीसम्म १ सय १४ जनामा हैजा संक्रमित पुष्टि भएको हो ।
यसैगरी, वीरगञ्जका विभिन्न अस्पतालमा झाडापखालाका कारण उपचारका लागि भर्ना भएका बिरामीको सङ्ख्या हालसम्म ४२२ पुगेको छ । तीमध्ये २ सय २३ जना उपचारपछि डिस्चार्ज भइसकेका छन् ।
महानगरपालिकाले हैजा सङ्क्रमणको प्रमुख कारण दूषित खानेपानी हुनसक्ने अनुमान गर्दै पानीको नमुना संकलन गरी प्रयोगशालामा परीक्षण गराइरहेको जनाएको छ । राष्ट्रिय जनस्वास्थ्य प्रयोगशाला, काठमाडौंमा परीक्षण गरिएको १० वटा नमुनामध्ये ८ वटामा हैजाको सङ्क्रमण पुष्टि भएको छ भने बाँकी २ वटाको रिपोर्ट आउन बाँकी छ ।
सङ्क्रमण फैलिन थालेपछि वीरगञ्ज महानगरले मातहतका सबै विद्यालय थप तीन दिनका लागि बन्द गर्ने निर्णय गरेको छ । विद्यालयका शिक्षक तथा कर्मचारीलाई हैजा नियन्त्रणसम्बन्धी जनचेतनामूलक कार्यक्रम सञ्चालन गर्न आग्रह गरिएको छ । महानगरपालिकाले सरसफाइ अभियान र सचेतनामूलक कार्यक्रमलाई तीव्रता दिएको छ ।
चिकित्सकहरूले सुरक्षित पानी उमालेर मात्र पिउन, खुला शौच नगर्न र व्यक्तिगत सरसफाइमा विशेष ध्यान दिन सर्वसाधारणलाई आग्रह गरेका छन् ।
थप समाचारहरु
इ–नेवल नेपालद्वारा अमेरिकन प्रविधिबाट निर्मित कृतिम हात निःशुल्क वितरण
आँखा उपचार सेवामा योगदान पुर्याउने विभिन्न व्यक्ति सम्मानित
प्रधानन्यायाधीश,सञ्चारमन्त्री र एमाले उपाध्यक्षद्वारा अर्थमन्त्रीको स्वास्थ्यस्थितिबारे जानकारी
बेलुन विष्फोट घटनाः आठ सदस्यीय छानबिन समिति गठन
काभ्रेमा रगतको चरम अभाव : बिरामी समस्यामा
ज्येष्ठ नागरिकलाई स्वास्थ्य सेवालिन बिमाकै भर
