काठमाडौं । स्वास्थ्य तथा जनसंख्या मन्त्री प्रदीप पौडेलले श्रावण महिनालाई ‘डेंगी सचेतना महिना’ को रूपमा मनाउने राष्ट्रिय अभियानको घोषणा गरेका छन् ।
बुधबार आयोजित औपचारिक कार्यक्रममा बोल्दै मन्त्री पौडेलले डेंगी रोगको संक्रमण साउन महिनाबाट सुरु हुने भएकाले यही समयमा सचेतना अभियानलाई तीव्र पार्नुपर्ने आवश्यकता औंल्याए ।
मन्त्री पौडेलले भने, ‘साउन महिनामा डेंगी लाग्ने सुरुवात हुन्छ । सुरुको महिनामै जनचेतना फैलाउने र पूर्वतयारी गर्ने हो भने भदौ, असोज र कात्तिकमा डेंगीको संक्रमणलाई फैलिनबाट रोक्न सकिन्छ ।’
उनका अनुसार विगतका वर्षहरूमा प्राप्त अनुभवका आधारमा डेंगी संक्रमण भदौदेखि कात्तिकसम्म उच्च रहन्छ । हालको तथ्यांकअनुसार वार्षिक रूपमा झण्डै ५० हजार मानिस डेंगीबाट संक्रमित हुने गरेका छन् । उनले यस अवस्थालाई सामान्य रूपमा नलिन आग्रह गर्दै भने, ‘यो असामान्य हो, यसको उपचारका लागि विशेष औषधि छैन, प्रमाणित खोपसमेत अझै विश्वव्यापी रूपमा उपलब्ध छैन ।’
सचेतनाको माध्यमबाट मात्र डेंगी नियन्त्रण गर्न सकिने उल्लेख गर्दै मन्त्री पौडेलले लार्भा नष्ट गर्न र आफ्नो वरपर सफा राख्न सबैलाई आग्रह गरे । ‘हामी जति सचेत भयौं, त्यति नै अरूलाई पनि सचेत गराउन सक्छौं ।’ उनले भने ।
स्वास्थ्य मन्त्रालयले आगामी दिनमा समुदायस्तरमा जनचेतनामूलक कार्यक्रम सञ्चालन गर्ने र डेंगी नियन्त्रणमा सहकार्यका कार्यक्रम अघि बढाउने जनाएको छ ।
थप समाचारहरु
स्वास्थ्य सेवा प्रवाहमा आत्मनिर्भरताको आवश्यकता छ : मन्त्री पौडेल
बालबालिकाको प्राणघातक रोग रुबेला उन्मुलनमा नेपाल सफल
हैजाका बिरामीको स्वास्थ्य बुझ्न महामन्त्री थापा नारायणी अस्पतालमा
स्वास्थ्य मन्त्रालयले जारी गरेको एकीकृत एम्बुलेन्स सञ्चालन कार्यविधिका कारण विरामीहरुलाई समस्या भयो : जनार्दन शर्मा
खेलाडीको स्वास्थ्य उपचारका लागि सम्झौता
मन्त्री बन्न लागेकी डा.संगीताको नाम काटिंदा तरंग–‘अन्याय मात्र होइन अत्याचार नै भयो’
