काठमाडौं । नेकपा एमालेका नेता तथा पूर्वपरराष्ट्रमन्त्री प्रदीप ज्ञवालीले अर्थमन्त्री डा. स्वर्णीम वाग्लेले नयाँ दिल्लीमा दिएको ‘नेपालमा भारतविरोधी राष्ट्रवादको युग सकियो’ भन्ने अभिव्यक्ति गैरकूटनीतिक र असान्दर्भिक भएको बताएका छन् ।
ज्ञवालीले उक्त अभिव्यक्तिले नेपालको स्वाभिमान र राष्ट्रिय हितमा आँच पुर्याउने टिप्पणी गरेका छन् । विदेशी भूमिमा सरकारी पदाधिकारीले आफ्नो मुलुकको आन्तरिक राजनीतिक मतभिन्नताबारे बोल्नु उचित नहुने उनको भनाइ छ ।
नेपालमा कहिल्यै ‘भारतविरोधी राष्ट्रवादको युग’ नरहेको उल्लेख गर्दै ज्ञवालीले नेपालले सधैँ सार्वभौम समानता, पारस्परिक हित र सम्मानमा आधारित मित्रवत् सम्बन्ध चाहेको बताएका छन्। कुनै व्यक्ति वा समूहको दृष्टिकोणलाई समग्र राष्ट्रको प्रतिनिधित्व गर्ने गरी व्याख्या गर्न नमिल्ने उनको तर्क छ ।
छिमेकी मुलुकसँग यस्ता विषयमा खुलस्त छलफल गर्नुपर्ने भन्दै उनले समस्यालाई लुकाएर सम्बन्ध बलियो नहुने बताएका छन् । यी विषय उठाउनु भारतको विरोध नभई नेपालको राष्ट्रिय हितसँग जोडिएको प्रश्न भएको उनको भनाइ छ ।
राष्ट्रिय हितको रक्षा गर्नु हरेक सरकारको दायित्व भएको उल्लेख गर्दै ज्ञवालीले त्यसका लागि बलियो राष्ट्रिय एकता, सहमति र गम्भीर कूटनीतिक पहल आवश्यक रहेको बताएका छन् । यथार्थलाई ढाकछोप गरेर अपनाइने तुष्टीकरणको नीतिले राष्ट्रिय हित र स्वाभिमानलाई बलियो नबनाउने उनको टिप्पणी छ ।
थप समाचारहरु
शिक्षा मन्त्रालयले त्रिवि जग्गा खोजबिन समितिको प्रतिवेदन सार्वजनिक गर्ने
ओलीको स्वास्थ्यमा समस्या देखिएपछि बैठक स्थगित
विशेष महाधिवेशनले एकताको सन्देश दिनेछ
राप्रपामा महाधिवेशनको माग तीव्र, नेतृत्वमाथि प्रश्न
प्रधानमन्त्री शाहले समानुपातिक सांसदहरूसँग आज विशेष छलफल गर्ने
ढल्केबरको ट्रमा सेन्टर निर्माण नरोकिने, लहानमा तत्काल ट्रमा युनिट सञ्चालन गरिने
