जनकपुर । नेपाली कम्युनिष्ट पार्टीका सहसंयोजक एवम् पूर्व प्रधानमन्त्री माधव कुमार नेपालले देश अहिले संकटमा रहेको बताएका छन् । यस संकटको समयमा सरकारको आलोचना गर्नुभन्दा सरकारलाई आवश्यक सल्लाह सुझाव दिने समय रहेको उनले धारणा राखेका छन् ।
आइतबार जनकपुरधाममा आयोजित एकता बैठक तथा प्रशिक्षण कार्यक्रममा बोल्दै सहसंयोजक नेपालले सरकारको कामप्रति आफूले नजर राखेको बताए । उनले विषम परिस्थितिमा सरकारलाई समस्या समाधान गर्न आवश्यक सुझाव दिएको जानकारी गराए । हराएका व्यक्तिहरूको खोज तलास गर्न र गाडिएका शवहरू निकालेर आफन्तको जिम्मा लगाउन आफूले सरकारलाई सुझाव दिएको सहसंयोजक नेपालले बताए । उनले भारतमा समेत बगेर शवहरू भेटिरहेको जानकारी गराउँदै सरकारलाई त्यसतर्फ पनि ध्यानाकर्षण गराए । राहत वितरण र समस्यामा परेकाहरूलाई साथ दिन सरकारलाई पार्टीले सहयोग गर्ने उनले प्रतिबद्धता जाहेर गरे ।
सहसंयोजक नेपालले सरकारलाई आगामी दिनहरूमा फेरि पनि यस्तै विपद्को सामना गर्नुपरे त्यसका निम्ति तयार रहन अहिलेदेखि नै बन्दोबस्त गरेर राख्न पनि सुझाव दिए । आफू प्रधानमन्त्री भएको समयमा जलवायु संरक्षण गर्ने उदाहरण प्रस्तुत गर्न सगरमाथामा क्याबिनेटको बैठक बसेको सुनाउँदै सहसंयोजक नेपालले प्रकृतिको संरक्षण गर्नुपर्नेमा जोड दिए ।
सहसंयोजक नेपालले पार्टीका नेता तथा कार्यकर्ताहरूलाई वडा स्तरसम्म गएर आफ्नो पार्टीले विगतमा गरेका कामकाजहरूबारे जानकारी गराउन निर्देशन दिए । उनले प्रचारप्रसारमा आफूहरू चुकेको स्विकार्दै अब जनतामाझ गएर आफू र आफ्नो पार्टीले गरेका कामहरू बारे टिपोट गरेर अवगत गराउने बताए ।
थप समाचारहरु
दलका जेनजीहरु भन्छन् : मागहरु जायज छन् तर नेतृत्व र प्रक्रियामा खुशी छैनौं
पुरानो राज्य प्रणाली यथावत राखेर निकास सम्भव छैन : विप्लव
राष्ट्रिय मेलमिलाप नीति आज पनि उत्तिकै सान्दर्भिक छ : डा. शेखर कोइराला
कुवेतको तेल रिफाइनरीमा ड्रोन आक्रमण
रायोको सागमा भेटियो उच्च विषादी, नष्ट गर्न निर्देशन
नेपालीहरूको जीवन करुणा, प्रेम, मानवता र शान्तिको उच्चतम अभ्यासबाट अभिप्रेरित छ : राष्ट्रपति पौडेल
