विराटनगर । रसुवाको भोटेकोशी नदीमा आएको विनाशकारी बाढीका कारण कोशी प्रदेशका विभिन्न जिल्ला स्थायी घर भएका १३० जना नागरिक सम्पर्कविहीन भएका छन् । काम, व्यापार, पर्यटन तथा धार्मिक भ्रमणका लागि रसुवा, नुवाकोट, धादिङलगायतका क्षेत्रमा पुगेका उनीहरू बाढीपछि परिवारको सम्पर्कमा नआएको नेपाल प्रहरीको तथ्यांकले देखाएको छ ।
हालसम्म प्राप्त प्रहरी विवरण अनुसार सम्पर्कविहीन हुनेहरूमा सबैभन्दा बढी सोलुखुम्बुका ३८ जना रहेका छन् । यस्तै सुनसरीका १७, मोरङका १४, उदयपुरका १३ र ओखलढुंगाका १२ जना रहेका छन् । यसैगरी इलामका ९, झापा र खोटाङका ८–८ जना, ताप्लेजुङका ६, संखुवासभाका ३, भोजपुर र धनकुटाका १–१ जना बाढीपछि बेपत्ता सूचीमा परेका छन् ।
सम्पर्कविहीन भएकामध्ये अधिकांश मानिसहरू रसुवास्थित माथिल्लो त्रिशुली–१, त्रिशुली ३–बी, दुसन र डोसनजस्ता जलविद्युत आयोजनामा कार्यरत मजदुर, इन्जिनियर, सवारी चालक, सुरक्षाकर्मी तथा क्यासिनो र होटेल व्यवसायी रहेका छन्। केही व्यक्ति भने गोसाइँकुण्ड तीर्थयात्रा तथा तिब्बततर्फ ट्रेकिङ गाइड र पर्यटकका रूपमा पुगेका थिए ।
यसैबीच, सम्पर्कविहीनको सूचीमा रहेकामध्ये ८ जना भने परिवारको सम्पर्कमा आइसकेको प्रहरीले जनाएको छ । सम्पर्कमा आउनेहरूमा उदयपुरका ३ जना, सुनसरीका २ जना तथा इलाम, ओखलढुंगा र सोलुखुम्बुका १–१ जना रहेका छन् ।
थप समाचारहरु
एमालेको नयाँ नेतृत्व चयनका लागि आज मतदान हुँदै
एमाले नेता गौतमद्वारा उपमहासचिव पदको उम्मेदवारी फिर्ता
आचारसंहिता अनुगमनलाई प्रभावकारी बनाउने केन्द्रीय सुरक्षा समितिको निर्णय
प्रतिनिधिसभा निर्वाचनः आयोगले नौ प्रकारका सामग्री पठाउने
सरकारले गरिब होइन, गरिबी भगाउने नीति लिनुपर्छः सांसद विष्णुमाया बिक
प्रतिनिधिसभामा दुई वटा विधेयक दर्ता
