काठमाडौं । राष्ट्रिय स्वतन्त्र पार्टीकी सांसद आशिका तामाङले नदीजन्य पदार्थ गिटी, बालुवा र ढुंगा उत्खनन तथा क्रसर उद्योग सञ्चालनसम्बन्धी कानुनलाई समयअनुकूल संशोधन गर्न सरकारसँग माग गरेकी छन् ।
सोमबार बसेको प्रतिनिधिसभाको बैठकमा बोल्दै सांसद तामाङले बर्खायाममा कानुनअनुसार खोलाबाट गिटी, बालुवा र ढुंगा निकाल्न निषेध गरिए पनि तस्करी नरोकिएको बताइन्।
उनले भनिन्,‘बर्खे महिनाहरूमा कानुन र नियमअनुसार खोलाबाट गिटी, बालुवा र ढुंगा निकाल्न निषेधित छ । तर तस्करहरूले एकै रातमा लाखौँ–करोडौँको बालुवा राज्यलाई एक रुपैयाँ कर नतिरिकन तस्करी गर्छन्।’
यो समस्या आफ्नो जिल्ला धादिङसहित नेपालका अधिकांश नदीमा जटिल बन्दै गएको उनले बताइन्। समस्या नदीजन्य पदार्थको उत्खननमा मात्र नभई कानुनी प्रक्रिया पनि जटिल रहेको उनको भनाइ छ।
‘मेरो मनसाय ढुंगा, गिटी र बालुवा निकाल्न पाउनु हुँदैन भन्ने पटक्कै होइन। तर यसको सही व्यवस्थापनमा कानुन बाधक बन्नु हुँदैन भन्ने चाहिँ हो,’ उनले भनिन्।
वातावरण संरक्षण र आर्थिक विकासबीच सन्तुलन कायम हुने गरी विद्यमान कानुनी व्यवस्था संशोधन गर्नुपर्नेमा उनले जोड दिइन्।
थप समाचारहरु
जम्मू–कश्मीरमा ‘क्लाउड ब्रस्ट’ : मृत्यु हुनेको सङ्ख्या ४५ पुग्यो
शिक्षा मन्त्रालयले त्रिवि जग्गा खोजबिन समितिको प्रतिवेदन सार्वजनिक गर्ने
सर्वसम्मत प्रतिनिधी छनोटले पार्टी एकताको सन्देश
ट्रम्पलाई भेट्न भेनेजुएलाकी विपक्षी नेता मारिया कोरिना माचाडो वाशिंगटन जाने
प्रधानमन्त्री कार्कीले लिइन् आगामी निर्वाचनबारे जानकारी
आज चार संसदीय समितिको बैठक बस्दै
