बर्दिया । बर्दिया जिल्ला कारागारमा कैदीबन्दीहरूले पाउँदै आएको फोन र रासन सुविधामा कटौती भएपछि उनीहरू र उनीहरूका आफन्तहरू समस्यामा परेका छन् । निर्वाचनको समय पारेर कारागार प्रशासनले फोन संख्या घटाएको र दैनिक उपलब्ध गराइने चामलको परिमाणमा समेत कमी गरेको भन्दै आफन्तहरूले गुनासो गरेका हुन् ।
फोनका लागि घण्टौं प्रतीक्षा
कैदीबन्दीका आफन्तहरूका अनुसार, यसअघि उपलब्ध रहेका फोनका सेटहरू कटौती गरिएपछि अहिले परिवार र कानुन व्यवसायीसँग कुरा गर्न निकै कठिनाइ भएको छ। ूआफ्नो मान्छेसँग दुई मिनेट कुरा गर्नका लागि पनि कैदीबन्दीहरू ४–५ घण्टासम्म लाइनमा बस्नुपर्ने बाध्यता छ, एक आफन्तले आरोप लगाए ।
चामल कटौतीको विवाद
फोन मात्र होइन, कैदीबन्दीले दैनिक रूपमा पाउने ७ सय ग्राम चामलमा पनि कटौती गरिएको आफन्तहरूको दाबी छ। सरकारले तोकेको मापदण्डअनुसार चामल नपाउँदा खानपानमा समस्या भएको उनीहरू बताउँछन् ।
प्रशासनको सफाइः दुरुपयोग रोक्न यसो गरिएको हो
यस विषयमा बर्दिया कारागारका प्रशासक मानबहादुर सारुसँग कुरा गर्दा उनले सुरक्षा र दुरुपयोग नियन्त्रणका लागि केही कदम चालिएको स्वीकार गरे। उनले भने, चुनावको समयमा फोनको धेरै गलत प्रयोजनका लागि प्रयोग हुन सक्ने जोखिमलाई ध्यानमा राखेर केही थान फोन कटौती गरिएको हो । कैदीबन्दीले परिवार र वकिलसँग कुरा गर्ने सुविधा पाए पनि त्यसको मिसयुज (दुरुपयोग) गरेको पाइयो ।
चामल कटौतीको सम्बन्धमा सारुले बचाउ गर्दै भने, नियमअनुसार एक जनालाई महिनाको २१ किलो चामल दिइने भए पनि त्यो परिमाण धेरै हुने र कैदीहरूले बढी भएको चामल बेच्ने गरेको पाइएको छ। कारागारभित्र चामल बेच्ने कार्य रोक्नका लागि आवश्यक जति मात्र चामल उपलब्ध गराइएको हो ।
प्रशासनले कैदीबन्दीलाई दिइने आधारभूत सुविधामा कुनै कमी नगरिएको दाबी गरे पनि, आफन्तहरूले भने मानव अधिकार र आधारभूत आवश्यकतामाथि कडाइ गरिएको भन्दै असन्तुष्टि जनाएका छन् ।
थप समाचारहरु
बाँकेमा निःशुल्क स्वास्थ्य शिविरबाट ज्येष्ठ नागरिक लाभान्वित
गुल्मी प्रशानद्वारा अशक्तलाई घरमै नागरिकता प्रदान
पाल्पामा थपिए एक वर्षमा ९७ उद्योग
नागरिकलाई सास्ती नहुनेगरी सडक विस्तार गर्न निर्देशन
लुम्बिनी र गण्डकी प्रदेश सरकार संयुक्त बैठकः गण्डकी आर्थिक त्रिभुज परियोजना कार्यान्वयनमा साझा सहमति
रोगले सुकेर उजाडिए सुन्तला बगैँचा
