काठमाडौं । धादिङ क्षेत्र नं १ की उम्मेदवार आसिका तामाङले आफ्नो उम्मेदवारी खारेज भएको भन्ने विषयमा विभिन्न सञ्चारमाध्यममा प्रकाशित समाचारप्रति गम्भीर आपत्ति जनाएकी छन् । उनले सामाजिक सञ्जाल मार्फत उक्त समाचार पूर्ण रूपमा भ्रामक र असत्य भएको स्पष्ट पारेकी हुन् ।
निर्वाचनको अन्तिम चरणमा केही मिडिया हाउसहरूले ‘आसिका तामाङको उम्मेदवारी खारेज भयो’ भन्ने शीर्षकमा समाचार प्रकाशित गरेकोप्रति गम्भीर ध्यानाकर्षण भएको जनाउँदै तामाङले आफ्नो उम्मेदवारी कायमै रहेको स्पष्ट पारेकी हुन् ।
उनले आफूलाई बारम्बार ‘विदेशी’ भन्दै लगाइएका आरोपहरू पनि असत्य र आधारहीन भएको दाबी गरिन् । ‘म यही देशको नागरिक हुँ। नेपालको संविधानले मलाई मतदान गर्ने र उम्मेदवार बन्ने पूर्ण अधिकार दिएको छ,’ उनले सामाजिक सञ्जालमा उल्लेख गरेकी छन् ।
तामाङले अन्तिम समयमा आफूलाई कमजोर बनाउन नियोजित रूपमा भ्रम फैलाइएको आरोप लगाउँदै यस विषयमा कानुनी उपचार खोजिसकेको जानकारी दिइन् ।
मतदातालाई कुनै पनि भ्रामक समाचारमा नपर्न आग्रह गर्दै उनले ढुक्क भएर मतदान गर्न अपिल गरेकी छन् । ‘म तपाईँहरूकै छोरी–चेली र उम्मेदवार हुँ । तपाईँहरूको विवेकपूर्ण मतले नै परिवर्तन सम्भव छ,’ उनले भनिन् । धादिङ क्षेत्र नं. १ मा प्रतिस्पर्धा रोचक बन्दै गइरहेका बेला उम्मेदवार तामाङले सत्यको विजय हुने विश्वास व्यक्त गरेकी छन् ।
थप समाचारहरु
चितवनमा २ हजारभन्दा बढी किसानलाई उन्नत बीउमा अनुदान
नेपाल विश्वविद्यालयको कुलपतिमा डा.लोहनी चयन
‘स्थानीय उद्यमशीलताको विकास र रोजगारी सृजना अहिलेको अवश्यकता
भूकम्पको शिर्षकमा बजेट छुट्याउन माओवादीको आग्रह
सरकारले आन्तरिक रोजगारको प्रवद्र्धनमा काम गरिरहेको छ : मन्त्री भण्डारी
शिक्षा मन्त्रालयले त्रिवि जग्गा खोजबिन समितिको प्रतिवेदन सार्वजनिक गर्ने
