काठमाडौं । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रविन्द्र मिश्रले आगामी निर्वाचनमा काठमाडौं क्षेत्र नम्बर १ बाट आफू विजयी हुनेमा अत्यन्तै विश्वस्त रहेको बताएका छन् ।
मंगलबार काठमाडौंमा आयोजित पत्रकार सम्मेलनमा बोल्दै मिश्रले यसपटक आफू एकसय प्रतिशत मात्र होइन, दुईसय प्रतिशत नै विश्वस्त रहेको दाबी गरे । उनले विगतमा विभिन्न पार्टीलाई मतदान गर्दै आएका मतदाताहरूबाट समेत व्यापक माया, स्नेह र समर्थन प्राप्त भइरहेको बताए ।
‘काठमाडौं क्षेत्र नम्बर १ मा पहिले अन्य पार्टीलाई भोट हालेका मतदाताहरूले नै मलाई माया गरेर कार्यक्रमहरू आयोजना गरिदिनु भएको छ,’ उनले भने, ‘दुईवटा चुनावमा झिनो मतान्तरले पराजित भएकाले तेस्रो पटक जित्ने अवस्थामा आइपुग्दा आत्मविश्वास र खुशी हुनु स्वाभाविक हो । यो पटक काठमाडौं क्षेत्र नम्बर १ बाट म विजय हुन्छु भन्ने कुरामा म १०० प्रतिशत होइन २०० प्रतिशत विश्वस्त छु ।’
मिश्रले आफू विजयी भएर संसदमा पुगेपछि पार्टीले अघि सारेका एजेण्डाअनुसार देशलाई अगाडि बढाउन नसकिए देशको हित नहुने स्पष्ट पारे ।
यसैबीच उनले आगामी फागुन २१ मा तोकिएको निर्वाचन केही समय पर सार्नुपर्ने धारणा पनि राखे । निर्वाचनअघि देश नयाँ समझदारीमा जान आवश्यक रहेको उल्लेख गर्दै उनले शान्तिपूर्ण संक्रमण सर्वपक्षीय सहमतिबाट मात्र सम्भव हुने बताए ।
‘संविधानको सर्भिसिङ होइन, अब ओभरहोलिङ(वृहत मर्मत) आवश्यक छ,’ मिश्रले भने, ‘देश ओभरहोलिङ गर्नुपर्ने बिन्दुमा पुगेको छ । म जित्नेमा ढुक्क भए पनि निर्वाचनभन्दा अघि देश नयाँ समझदारीको बाटोमा जानुपर्छ, त्यसपछि मात्र निर्वाचन होस् भन्ने मेरो चाहना हो ।’
थप समाचारहरु
नागरिकको अपेक्षा र आवश्यकताअनुसार प्रदेश सरकारले काम गर्छ : मुख्यमन्त्री कँडेल
मानसिक स्वास्थ्यलाई उच्च प्राथमिकतामा राखेका छौः स्वास्थ्य मन्त्री गौतम
नेकपा एमालेको मूल व्यवस्थापन समितिको बैठक बस्दै
यस्ता छन् मन्त्रिपरिषद् बैठकका निर्णयहरु
चुनावी अभियानमा रास्वपाका नेता बालेन शाह तेह्रथुममा
प्रतिनिधिसभा निर्वाचन ३८ दिन बाँकीः संयुक्त निर्वाचन सञ्चालन केन्द्रले थाल्यो काम
