काठमाडौँ । मानवसेवा आश्रम रानीवन शाखाले काठमाडौँका विभिन्न स्थानबाट दुई जना सडकमानवको उद्धार गरी संरक्षणमा राखेको छ। काठमाडौँ महानगरपालिका–९ सिनामंगल क्षेत्रबाट ६० वर्षीय सत्य थापा र चन्द्रागिरी नगरपालिका–१० बलम्बु क्षेत्रबाट ४२ वर्षीय बौचा महर्जनलाई अलपत्र अवस्थामा फेला पारेपछि प्रहरीको समन्वयमा उद्धार गरिएको हो।
स्थायी ठेगाना मोरङ रहेकी सत्य थापा घरपरिवार तथा आफन्तको अभावमा बेवारिसे अवस्थामा सडक जीवन बिताइरहेका थिइन्। त्यस्तै, बलम्बु क्षेत्रमा फेला परेका बौचा महर्जन पनि शारीरिक तथा मानसिक रूपमा कमजोर अवस्थामा रही मागेर जीविकोपार्जन गरिरहेका थिए। स्थानीयवासीले दिएकाे सूचनाकाे आधारमा प्रहरीले उद्धार गरी मानवसेवा आश्रमलाई जिम्मा लगाएको हो।
उद्धार पश्चात दुवै जनाको प्रारम्भिक स्वास्थ्य परीक्षणसँगै आश्रममै सुरक्षित वातावरणमा बसोबास गरिरहेका छन्।
मानवसेवा आश्रमले ‘जसको केही छैन, जसको कोही छैन’ भन्ने मूल मन्त्रका साथ विगत १३ वर्षदेखि सडकआश्रित, बेवारिसे तथा व्यक्तिहरूको उद्धार, उपचार, पालनपोषण तथा सम्भव हुनेहरूको पारिवारिक पुनर्मिलन सेवामा निरन्तर रूपमा काम गर्दै आएको छ। हाल आश्रमले देशभर २९ वटा शाखा सञ्चालन गर्दै ७७ जिल्लामा सडकआश्रित व्यक्तिहरूको जीवन संरक्षण र पुनर्स्थापनाका लागि सेवा प्रदान गरिरहेको छ।
थप समाचारहरु
कति सिकियो त भूकम्पले सिकाएको पाठ
असमानता, गरिबी र भ्रष्टाचारलाई चिरेर सरकार अघि बढ्छ : प्रधानमन्त्री
पाँचवटा संसदीय समितिको बैठक बस्दै, यस्ता छन् कार्यसूची
राष्ट्रिय पुरुष तथा महिला हक्की प्रतियोगिता हुँदै
‘भिजिट भिसा प्रकरणका विषयमा छानविन समिति बनाउन गम्भीर बन्नुपर्छ’
युवाको आचरण र अनुशासन नै देशको ठूलो चुनौती : ओली
