गाउँ–गाउँमै पुगेर राष्ट्रिय परिचयपत्र वितरण सुरु, रामेछापका नागरिकलाई सहजता

रामेछाप । जिल्ला प्रशासन कार्यालय रामेछापले नागरिकलाई सहज रूपमा राष्ट्रिय परिचयपत्र उपलब्ध गराउन गाउँ–गाउँमै पुगेर परिचयपत्र वितरण र नयाँ विवरण सङ्कलन अभियान सुरु गरेको छ ।

सोही अभियान अन्तर्गत सोमबारदेखि गोकुलगंगा गाउँपालिका–१ चुचुरेमा बनेका परिचयपत्र वितरण र नयाँ परिचयपत्रका लागि विवरण सङ्कलन सुरु गरिएको हो । यसअघि सुनापति गाउँपालिका र रामेछाप नगरपालिकामा पनि बनेर आएका परिचयपत्र वितरण र नयाँ विवरण संकलनको काम सम्पन्न भइसकेको छ ।

स्थानीय तहमा नै पुगेर परिचयपत्र वितरण र तथ्याङ्क सङ्कलन गरिँदा नागरिकलाई सदरमुकाम धाउनुपर्ने बाध्यता हटेको छ । यसले सेवाग्राहीलाई प्रत्यक्ष लाभ पुगेको जिल्ला प्रशासन कार्यालयले जनाएको छ ।

रामेछापका प्रमुख जिल्ला अधिकारी श्यामकृष्ण थापाले सोमबारदेखि गोकुलगंगा गाउँपालिकामा सुरु गरिएको अभियान विस्तारै सबै स्थानीय तहमा पु¥याइने जानकारी दिए । उनका अनुसार हालसम्म रामेछाप नगरपालिकाको वडा नं. १, ३, ४, ५, ६ र ७ मा सो कार्यक्रम सम्पन्न भइसकेको छ । सो क्रममा ६४६ जनाको विवरण सङ्कलन गरिएको छ भने १४१ वटा बनेर आएका परिचयपत्र वितरण गरिएका छन् ।

यसैगरी सुनापति गाउँपालिकामा ५६७ जनाको विवरण सङ्कलन गरिएको छ । परिचयपत्र वितरणसँगै स्थानीय प्रशासन र प्रहरीले सचेतनामूलक कार्यक्रम पनि एकैसाथ सञ्चालन गरेको हुँदा नागरिकले दोहोरो लाभ उठाएका छन् ।

सामाजिक सुरक्षा भत्ता लिन र बैङ्क खाता खोल्न राष्ट्रिय परिचयपत्र अनिवार्य भएपछि ज्येष्ठ नागरिक र असक्त व्यक्तिहरू समेत जिल्ला सदरमुकाम धाउनुपर्ने अवस्था आएको थियो । त्यस्तो कठिनाइलाई मध्यनजर गर्दै जिल्ला प्रशासन कार्यालयले सेवा गाउँमै पु¥याउने नीति लिएको हो ।

थप समाचारहरु

मदन भण्डारीको जन्मजयन्ती मनाइने, संयोजकमा डोरमणि पौडेल भगवती न्यौपाने संघीय मामिला तथा सामान्य प्रशासन मन्त्रीमा नियुक्त चारवटा संसदीय समितिको बैठक बस्दै, यस्ता छन् कार्यसूची विकासशील राष्ट्रहरूको साझा अनुभव नै कृषिको विकासका लागि ठूलो स्रोत हुन सक्छ : कृषिमन्त्री अधिकारी नेपालको श्रीलंकाविरुद्ध सानदार जित एनसीसी अमेरिकाको सहमति कार्यान्वयन गराउन आरसी पराजुलीले गरे अपिल