काठमाडौं । नेकपा एकीकृत समाजवादीका अध्यक्ष माधव नेपालले केपी ओलीले देशको कम्युनिस्ट आन्दोलनलाई सिध्याएरै छाड्ने आरोप लगाएका छन् । विराटनगर विमानस्थलमा सञ्चारकर्मीसँग कुरा गर्दै उनले यस्तो बताएका हुन् ।
‘एमालेभित्र तमासा हेर्दै जानुस्, देशको कम्युनिस्ट आन्दोलनलाई सिध्याएरै छोड्छन् केपी ओलीले,’ उनले भने, ‘राष्ट्रकै निम्ति ठूलो नोक्सान पुर्याउने स्थितिमा पुर्याउँछन् ।’ उनले यो सरकार सबै हिसाबले असफल भएको बताउँदै भने, ‘एउटा व्यक्ती केपी ओलीको अहङ्कारको दम्भका कारण देश पीडित छ ।’
उनले आफूलाई लागेको भ्रष्टाचारको मुद्दा राजनीतिक प्रतिशोध भएको पनि आरोप लगाएका छन् । उनले आफू माथि पूर्वाग्रह भएको कुरा सबैले बुझेको र आफूले एक पैसा पनि तलमाथि नगरेको दाबी गरे ।
‘मेरो केस त कुनै भ्रष्टाचारको केसै होइन, मन्त्रिपरिषद्को सर्वसम्मत निर्णयबाट भएको हो, जसमा नेपाल सरकारलाई एक पैसा पनि नोक्सान भएको छैन,’ उनले भने, ‘यो त राजनीतिक पूर्वाग्रह हो, त्यो प्रतिशोध हो भन्ने कुरा सबैले बुझेका छन्, मैले जिन्दगीमा एक पैसा पनि तलमाथि गरेको छैन।’
कुराकानी कै क्रममा अध्यक्ष नेपालले पार्टी भित्र निर्णय नमान्ने नेताहरूको सूचीमा झलनाथ खनाल एक नम्बरमा रहेको भन्दै उनलाई पार्टीमा बस्ने अधिकार समेत नभएको बताए ।
