मधेसमा खडेरीको असर घटाउन कृषिबाली परिवर्तन गर्नुपर्नेमा जोड

काठमाडौँ, १३ साउनः मधेसप्रदेशमा खडेरीका कारण हुनसक्ने खाद्य सङ्कट समाधानका लागि कृषिबाली परिवर्तन गर्नुपर्नेले विज्ञहरूले जोड दिनुभएको छ । सोमबार सञ्चारिका समूह र एक्सन एडकद्वारा संयुक्त रूपमा अयोजना गरेको ‘जलवायु न्याय’सम्बन्धी कार्यक्रममा खडेरीको असर घटाउन कृषिबाली परिवर्तन गर्नुपर्नेमा जोड दिइएको हो ।

कार्यक्रमका सहभागीले मधेससहित मुलुकका अधिकांश तराई क्षेत्रमा मनसुनको समयमा पनि खडेरीका कारण रोपाइँमा समस्या हुँदै आएकाले मौसम अनुकूल कृषिबाली लगाउनुपर्नेमा जोड दिएका हुन् ।

मौसममा आएको परिवर्तनका कारण खाद्यसुरक्षा जोखिम बढ्ने आँकलनका बीच सुक्खास्थान अनुकूल खेती गर्नुपर्ने कृषिविज्ञ डा कृष्ण पौडेलले बताए । उनले मधेस तथा तराई क्षेत्रमा देखिएको खडेरीको समस्या आकस्मिक नभएको उल्लेख गरे ।

पौडेलले कृषि क्षेत्रमा प्रयोग गरिएको विषादी र रसायनले माटोको उर्वर शक्ति गुमाएकाले समस्या आएको बताउँदै विषादी र रसायनको अत्यधिक प्रयोगले वातावरण तातो हुँदा हालको खडेरीको समस्या निम्तिएको धारणा राखे । आगामी दिनमा कृषि प्रणाली परिवर्तन गरी तराई क्षेत्रको वातारण चिसो बनाउन हरियाली कायमतर्फ सबै अग्रसर हुनुपर्नेमा उनले जोड दिए ।

कृषिबालीमा सिर्जित समस्या समाधानका लागि सरकारले घोषणा गरेको डिपबोरिङ बनाउने योजनाले तराईलाई मरुभूमि बनाउनसक्ने बताउँदै कृषिविज्ञ डा पौडेलले खेती प्रणाली परिवर्तन गर्नु उपयुक्त विकल्प हुने उल्लेख गरे ।

वरिष्ठ अधिवक्ता पदमबहादुर श्रेष्ठले जलवायु परिवर्तनबाट मानव मात्र नभई वन्यजन्तु र वनस्पति समेत प्रभावित भएकाले ती क्षेत्रका मुद्दा उजागर हुनुपर्ने बताए । जलवायु परिवर्तन सम्बन्धी अन्तरराष्ट्रिय अदालतले वन्यजन्तु र वनस्पतिको मुद्दा उठाउन वैकल्पिक मार्ग देखाउनुपर्नेमा उनले जोड दिए ।

वरिष्ठ अधिवक्ता राजु चापागाईंले जलवायु न्यायका लागि तीनै तहका सरकार, सरोकार भएका निकाय लगायत सङ्घसंस्थाले भावी पुस्ताको अधिकारका बारेमा ध्यान दिई दिगो विकासमा केन्द्रित हुनुपर्नेमा जोड दिए । दुई पुस्ताबीचको अन्तरसम्बन्ध मजबुत बताउन जलवायु परिवर्तनका मुद्दा सम्बोधन गर्नुपर्ने उनको भनाइ छ ।

सञ्चारीका समूहकी अध्यक्ष कमला पन्थीले जलवायु न्यायबाट विशेषगरी महिला प्रभावित भएका बताए । सुक्खा भएसँगै पानीका लागि लामो यात्रा गर्दा महिला प्रभावित हुने भएकाले सरोकार भएका निकायको सहकार्य र समन्वयमा जलवायु परिवर्तनका असर न्यूनीकरणमा केन्द्रित हुन सबैलाई आग्रह गरे ।

थप समाचारहरु

जनकपुर न्यूरो हस्पिटलमा स्वास्थ्य सेवा विभागको अनुगमन मानवअधिकार आयोगले भन्यो : सप्तरी घटनाको छानबिन गरी दोषीलाई कारबाही गर नेपाली पत्रकारिताका ‘शिखर पुरुष’ राजेश्वर नेपालीको निधन बारामा शिक्षक हत्यामा संलग्नको आशंकामा एक जना पक्राउ कमला नदीमा अनौठो भूत मेला, स्नान गर्ने श्रद्धालुहरुको घुइँचो सिमरा विमानस्थलमा रिफ्युलिङ सेन्टर