२६ साउन, अछाम । रामारोशन गाउँपालिकाबाट काठ बोकेको हिँडिरहेको ट्रक सडक भासिदा दुर्घटनामा परेको छ । दुर्घटना हुँदा पाँच जना घाइते भएका छन् ।
घाइतेको थप उपचारका लागि सदरमुकाम मङ्गलसेनस्थित जिल्ला अस्पताल मङ्गलसेन लगिएको छ । घाइते हुनेमा बैतडीको दशरथचन्द नगरपालिका –२ बस्ने हरिसिंह भण्डारी, अछाम जिल्ला मङ्गलसेन नगरपालिका –१२ बिर्कुका अर्जुन रावल रहेका अछाम प्रहरीले जनाएको छ ।
घाइते हुनेमा मङ्गलसेन नगरपालिका –१२ बिर्कुकै सोही वडा निवासी कृष्ण रावल, इन्द्र रावल, शेर कुँवर रहेको अछाम प्रहरीका प्रमुख ईश्वरीप्रसाद भण्डारीले जानकारी दिनुभयो ।
ना.६.ख. ८३१९ नम्बरको ट्रक उत्तिसको काठ लिएर नेपालगन्जतर्फ जानेक्रममा मङ्गलसेन नगरपालिका –१४ कालागाउँ दाइजेपानी भन्ने स्थानमा दुर्घटना भएको थियो । ट्रक कच्ची भित्री सडक खण्डबाट करिब ४० मिटर तल खसेको बताइएको छ ।
