25 चैत, काठमाडौं । नागरिक उन्मुक्ति पार्टीकी अधयक्ष एवम् प्रतिनिधिसभा सदस्य रञ्जिता श्रेष्ठलगायतको टोलीले टीकापुरको विकासका लागि आवश्यक पूर्वाधार तयार गरिदिन प्रधानमन्त्री पुष्पकमल दाहाल ‘प्रचण्ड’ लाई आग्रह गरेका छन् ।
आइतबार प्रधानमन्त्रीको सरकारी निवास वालुवाटारमा टीकापुरको विकासका लागि ७ बुँदे ज्ञापनपत्र बुझाउँदै नाउपाकी अध्यक्ष एवं पूर्वमन्त्री रञ्जिता श्रेष्ठ, टीकापुरका मेयर रामलाल डगौरालगायतले आग्रह गरेका हुन् ।
नाउपाकी अध्यक्ष रञ्जिता श्रेष्ठले टीकापुर नगरपालिकाको गुरुयोजनासहित स्मार्ट सिटी निर्माणको लागि पहल गर्न माग गरिएको बताइन् ।
उनले रातोकागजसँग भनिन्, ‘ प्रधानमन्त्री ज्यूसँग भेटेर टीकापुरको विकासका लागि पहल गरिदिन आग्रह गरेका छौं। किनकी टीकापुर विकासको सम्भावना बोकेको क्षेत्र हो। ‘ जवाफमा प्रधानमन्त्री पुष्पकमल दाहाल प्रचण्डले टीकापुरको विकासका लागि आएको ज्ञापनपत्र अनुसार काम अगाडि बढाउन निर्देशन दिइसकिएको बताएका थिए ।
टीकापुर–५ दौलतपुरस्थित सुदूरपश्चिम र लुम्बिनी प्रदेश जोड्ने कर्णाली नदीमा पक्की पुल निर्माणको लागि पहल गर्न, टीकापुरमा विमानस्थल सञ्चालन पहल गर्न, बेलुवाबाट भजनी नगरपालिका जोड्ने पथरैया पक्की पुल निर्माणको पनि माग राखिएको छ।
टीकापुर बसपार्कदेखि पार्क जाने बाटो ढल निकाससहित कालोपत्रे निर्माण, बाहिरी चक्रपथ निर्माण, प्लान्ट क्वारेनटाइन र खाद्य गुणस्तर कार्यालयको पुनर्स्थापना र टीकापुर क्षेत्रमा वाणिज्य कार्यालय र यातायात कार्यालय स्थापनाको पहलका लागि प्रधानमन्त्रीसँग आग्रह गरिएको छ ।
प्रतिक्रिया दिनुहोस्