२० पुस, काठमाडौं । काठमाडौं उपत्यकाको न्यूनतम तापक्रम आज ३.५ डिग्री सेल्सियसमा झरेको छ । हिजोको न्यूनतम तापक्रम ४.५ डिग्री सेल्सियस थियो ।
जल तथा मौसम विज्ञान विभागको मौसम पूर्वानुमान महाशाखाका मौसमविद गोविन्द झाका अनुसार आज बिहान पौने ६ बजे काठमाडौंको न्यूनतम तापक्रम ३.७ डिग्री सेल्सियस थियो । पौने ९ बजे झन् घटेर ३.५ डिग्री सेल्सियस मापन भएको र यो यस सिजनको अहिलेसम्मको सबैभन्दा कम तापक्रम भएको झाले बताए ।
न्यूनतम तापक्रम घटेकाले आज काठमाडौंमा अन्य दिनको तुलनामा जाडो पनि धेरै महसुस भइरहेको छ ।
मौसम पूर्वानुमान महाशाखाका अनुसार अहिले नेपालमा पश्चिमी वायुको आंशिक प्रभाव छ । कोशी र गण्डकी प्रदेशका उच्च पहाडी तथा हिमाली भूभागका एक–दुई स्थानमा हल्का हिमपात तथा तराई मधेशमा हुस्सु कुहिरो लागिरहेको छ ।
पश्चिमी वायुको प्रभावले केही बदली पनि भइरहेको छ । यसले कुहिरो हटाउन मद्दत गर्ने भए पनि तत्काल पानी पर्ने सम्भावना भने नरहेको मौसमविदहरुले बताएका छन् ।
‘पश्चिमी वायुको प्रभावले बदली भइ कुहिरो हटाउन सहयोग गरेको छ तर आगामी एक हप्तासम्म नेपालमा वर्षाको सम्भावना छैन,’ मौसमविद विनोद पोखरेलले सामाजिक सन्जाल एक्समा लेखेका छन् ।
थप समाचारहरु
काठमाडौँको तापक्रम निरन्तर घट्दो, जाडो अझै बढ्ने
चिसोले खुम्बु क्षेत्रमा विकास निर्माण अवरुद्ध
आजदेखि मौसममा सुधार, काठमाडौंमा घाम लाग्यो
काठमाडौँमा मध्याह्नपछि पानी पर्ने सम्भावना
काठमाडौंका संस्थागत विद्यालयले नेपालीमा नाम नराखे भर्ना रोक्का
काठमाडौंको वायु प्रदूषण : पाकिस्तान र भारतकोभन्दा पनि खराब
