जनकपुर न्यूरो हस्पिटलमा स्वास्थ्य सेवा विभागको अनुगमन

२९ साउन, जनकपुरधाम । अनुमति नलिई सञ्चालित जनकपुर न्यूरो हस्पिटमा स्वास्थ्य सेवा विभागले सोमबार अनुगमन गरेको छ । स्वास्थ्य सेवा विभाग, मेडिकल काउन्सिल, मधेश प्रदेश सरकारको स्वास्थ्य महाशाखा र जिल्ला प्रशासन कार्यालयको प्रतिनिधिसहितको टोली सोमबार हस्पिटल पुगेको थियो ।यस हस्पिटलमा विभागबाट स्वीकृति लिएरमात्र अस्पताल सञ्चालन हुनुपर्नेमा कुनै पनि निकायबाट अनुमति नलिई सञ्चालन गरिएको र उपचारमा लापरबाहीका कारण केही बिरामीको मृत्यु भएको समेत पाइएको छ । सोमबार विहान ८ बजे हस्पिटलमा पुगेको टोली करिब ३ घण्टासम्म हस्पिटलमा रहेको थियो ।

‘समाचारमा आएको यो हस्पिटलको विषयमा प्रशासनसँग छलफल र हस्पिटलको अनुगमन गरिएको छ’ स्वास्थ्य सेवा विभागको उपचारात्मक महाशाखाका निर्देशक डा. अनुप बास्तोलाले अनलाइनखबरसंग भने ।

उनका अनुसार यही हस्पिटलको विषयमा मेडिकल काउन्सिलको पनि चासो रहेकाले उसको पनि प्रतिनिधिसंगै आएर अनुगमन गरेको हो । यो हस्पिटलले विभागमा अनुमतिका लागि दिएको निवेदनको विषयमा पुनः अनुगमन समेत गरिएको निर्देशक बास्तोलको भनाइ छ ।

अनुगमनको विस्तृत विवरण तयार गरेपछि त्यसको जानकारी गराउने बास्तोलाले बताए ।

अनुगमनमा सहभागी एक अधिकारीका अनुसार हस्पिटललाई तुरुन्त मापदण्ड पूरा गरी स्वीकृति लिन अथवा विशिष्टिकृत सेवा हटाएर जेनरल सेवा सञ्चालनको अनुमति अथवा हस्पिटल नै बन्द गर्न टोलीले निर्देशन दिएको छ ।

यसअघि आइतबार नै लापरबाहीले बिरामीको मृत्यु भएको घटनाप्रति राष्ट्रिय मानव अधिकार आयोगले चासो देखाउँदै जिल्ला प्रशासन कार्यालय र जिल्ला प्रहरी कार्यालय धनुषालाई पत्राचार गरी घटनामा भएको अनुसन्धानको सम्पूर्ण जानकारी पठाउन निर्देशन दिएको थियो ।

डेढ वर्षदेखि जनकपुरको मुरलीचोकमा डा. विजय राउत र इन्जिनियर अजय राउतले संचालन गरेका छन् । दर्ताको लागि सुरुमै स्वास्थ्य सेवा विभागमा निवेदन दिएको छ । हालसम्म दर्ताको लागि विभागले दुई÷तीन पटक अनुगमन गरेपनि मापदण्ड पूरा गरेको छैन । जसको कारण सञ्चालन स्वीकृति प्रदान नगरेको स्वास्थ्य सेवा विभागको अस्पताल अनुगमन तथा सुदृढीकरण शाखा प्रमुख नरेन्द्र खनाल बताउँछन् ।

थप समाचारहरु

मानवअधिकार आयोगले भन्यो : सप्तरी घटनाको छानबिन गरी दोषीलाई कारबाही गर तराईमा तापक्रम निरन्तर बढ्दै, वीरगञ्जका विद्यालय थप तीन दिन बन्द ‘सीमा सुरक्षा पहिलो प्राथमिकता’ केरा खेतितर्फ आर्कषित रौतहटका कृषक फोहोरलाई जथाभावी विसर्जन गर्दा वनस्पति र बन्यजन्तुलाई असर माओवादी चुनाव लड्नै सक्दैन भन्ने विरोधीहरुको भाष्य खारेज भयो : प्रचण्ड