५ भाद्र, काठमाडौँ। कर्णालीका मुख्यमन्त्री यामलाल कँडेलले पूर्वाधार सुनिश्चित गरेर मात्र दशौँ राष्ट्रिय खेलकुद प्रतियोगिताको मिति तोक्न संघीय सरकारलाई आग्रह गरेका छन् ।
संघीय सरकार युवा तथा खेलकुद मन्त्री तेजुलाल चौधरीसँग बुधवार प्रतियोगिताबारे वीरेन्द्रनगरमा छलफल गर्दै मुख्यमन्त्री कँडेलले हतारमा मिति घोषणा नगर्न आग्रह गरेका हुन् । उनले पूर्वाधारका काम समयमै सम्पन्न हुने सुनिश्चित भएपछि मात्रै प्रतियोगिताको मिति घोषणा गर्दा उपयुक्त हुने बताए ।
कर्णाली प्रदेशमा हुन लागेको दशौँ राष्ट्रिय खेलकुद प्रतियोगिता आगामी मंसिर १२ हुने भन्दै एक सय दिनको काउन्डाउन नै सुरु गरिएको छ । तर मुख्यमन्त्री कँडेलले भने यति दिन भनेर काउनडाउन नगर्न समेत कर्णाली खेलकुद परिषद्लाई निर्देशन दिएका छन् ।
कर्णाली प्रदेशले भौतिक पूर्वाधारमा उल्लेख्य लगानी गरिसकेको बताउँदै मुख्यमन्त्री कँडेलले खेलकुद प्रतियोगितालाई भव्य र सभ्य रूपमा सम्पन्न गर्न प्रदेश सरकारका तर्फबाट सक्दो प्रयास रहने बताए ।
यस अघिका राष्ट्रिय खेलकुद प्रतियोगिताहरूमा संघीय र प्रदेश सरकारबिच जिम्मेवारीको विषयमा कतिपय अन्योल रहेको चर्चा गर्दे मुख्यमन्त्री कँडेलले यस पटक त्यसो हुन नदिन पहिले नै प्रतियोगिताको जिम्मेवारी बाँडफाँडमा समेत प्रस्ट हुनुपर्ने बताएका छन् ।
युवा तथा खेलकुद मन्त्री चौधरीले भने कर्णाली सरकारले खेलकुद क्षेत्रमा गरेको भौतिक प्रगतिको काम प्रशंसा योग्य भएको बताए ।
उनले भौतिक पूर्वाधार सुनिश्चित भएपछि मात्र प्रतियोगिताको मितिबारे छलफल गरिने समेत धारणा राखेका थिए । प्रतियोगिताको कामको जिम्मेवारीको सन्दर्भमा मन्त्रालयले केही दिनभित्रै निर्देशिका बनाउने मन्त्री चौधरीले बताए ।
अहिलेसम्म भौतिक निर्माणमा कर्णाली प्रदेश सरकारलाई रकम उपलब्ध गराउन नसकेको बताउँदै मन्त्री चौधरीले आफूले त्यसतर्फ संघीय सरकारको ध्यानाकर्षण गराउने बताए ।
थप समाचारहरु
ओलम्पिकको स्वर्ण पदकमा चीन शीर्ष स्थानमा
साफ यु–१७ च्याम्पियनसिप: सेमिफाइनलमै सकियो नेपालको यात्रा
जनकपुर बोल्ट्सलाई काठमाडौं गुर्खाजको १०२ रनको लक्ष्य
लुम्बिनीलाई हराउँदै कर्णालीको रोमाञ्चक जित, कर्णाली पुग्यो प्लेअफको नजिक
तरुण कप भलिबल प्रतियोगिता आगामी फागुनमा
नेपाली टोली पहिलो पटक महिला विश्वकपको ग्लोबल छनोटमा
