काठमाडौं । अफगानिस्तानको पूर्वी भागमा आइतबार राति गएको शक्तिशाली भूकम्पले ८१२ जनाको मृत्यु भएको छ भने २ हजार ८१७ जना घाइते भएका छन् ।
अमेरिकी भूगर्भीय सर्वेक्षण (यूएसजीएस) का अनुसार भूकम्प ६.१ म्याग्निच्युड रहेको थियो । स्थानीय समयअनुसार आइतबार राति ११ः४७ बजे जालालाबाद (नंगरहार प्रान्त) नजिकै, करिब २७ किलोमिटर टाढा, ८ किलोमिटर गहिराइमा केन्द्रविन्दु रहेको बताइएको छ ।
अफगानीस्तानको अन्तरिम सरकारका प्रवक्ताका अनुसार सबैभन्दा ठूलो क्षति कुनार प्रान्तका नुर्गल, सुकी, वाटापुर र चापा दारा जिल्लामा भएको छ । नुर्गल क्षेत्रका एक स्थानीयले चाइना ग्लोबल टेलिभिजन नेटवर्क (सीजीटीएन) सँग कुरा गर्दै गाउँका घर पूर्णरूपमा ध्वस्त भएको बताए ।
“आइतबार मध्यरातमा आएको भूकम्प निकै शक्तिशाली थियो । हामीले करिब २०० घाइतेलाई हेलिकोप्टरमार्फत जालालाबादको अस्पतालमा पु¥यायौं, अझै पनि ३०० देखि ३५० जना भग्नावशेषमुनि फसेका छन् । हाम्रो गाउँका सबै घर ध्वस्त भएका छन्,” वादिर गाजीअबाद गाउँका बासिन्दा जद्रानले बताए ।
स्थानीय भौगोलिक कठिनाइका कारण उद्धारमा समस्या भइरहेको जनाइए पनि उद्धार टोली र राहत संस्था प्रभावित क्षेत्रमा पुगेर कार्य तीव्र पारिरहेको अधिकारीहरूले बताएका छन् ।
भूकम्प प्रभावित स्थानीयहरूले अन्तर्राष्ट्रिय सहयोगको माग गरेका छन् ।
“हाम्रो सरकारका अधिकारीहरू तुरुन्तै सहयोगका लागि पुगेका छन्, जसका लागि हामी आभारी छौं । तर हामी अन्तर्राष्ट्रिय समुदायलाई अझै सहयोगका लागि आग्रह गर्छौं,” जद्रानले भने ।
वादिर गाजीअबादका अर्का बासिन्दा मोहम्मद इब्राहिमले भने, “मेरो परिवारका २५ जना सदस्य भूकम्पमा मारिए र अझै भग्नावशेषमुनि छन् । म अन्तर्राष्ट्रिय समुदायलाई सहयोगको अपिल गर्छु, अल्लाहले यसका लागि उनीहरूलाई पुण्य दिनुहुनेछ ।”
थप समाचारहरु
एनसीसी अमेरिकाको सहमति कार्यान्वयन गराउन आरसी पराजुलीले गरे अपिल
इजरायल द्वारा सिरियाली राष्ट्रपति दरबार क्षेत्रमा आक्रमण
कश्मीरमा भारतीय सुरक्षा बल र आतंककारीबीच मुठभेड
इजरायली आक्रमणमा पाँच जना अलजजिरा पत्रकारको मृत्यु
जम्मू–कश्मीरमा ‘क्लाउड ब्रस्ट’ : मृत्यु हुनेको सङ्ख्या ४५ पुग्यो
अफगानिस्तान भुकम्पः पाँचसय भन्दा धेरैको मृत्यु, एकहजार व्यक्ति घाइते
