काठमाडौं । माइकल ओलिसेको ह्याट्रिक तथा ह्यारी केनको कीर्तिमानी १००औँ बुन्डेसलिगा गोलको मद्दतमा बायर्न म्युनिखले युनियन बर्लिनलाई ७–० को फराकिलो अन्तरले पराजित गरेको छ ।
बायर्नको जितमा ओलिसेले तीन तथा केनले दुई गोल गरे । जमाल मुसियाला र इस्माइल सैबारीले एक–एक गोल थपे । यो जितसँगै बायर्नले जारी बुन्डेसलिगा सिजनमा आफ्नो अपराजित यात्रा कायम राखेको छ ।
खेलको १८औँ मिनेटमा मुसियालाले गोल गर्दै बायर्नलाई अग्रता दिलाएका थिए । अल्फोन्सो डेभिसको उत्कृष्ट प्रयासपछि आएको अवसरमा मुसियालाले करिब २० यार्ड टाढाबाट शानदार गोल गरेका थिए ।
३९औँ मिनेटमा ओलिसेलाई टम रोथेले पेनाल्टी क्षेत्रमा लडाएपछि बायर्नले पेनाल्टी पायो । उक्त पेनाल्टीमा केनले गोल गर्दै टोलीको अग्रता २–० बनाए ।
त्यस गोलसँगै केनले बुन्डेसलिगामा १०० गोल पूरा गरे । उनले ९८ खेलमै १०० गोल पूरा गर्दै जर्मन शीर्ष डिभिजनमा सबैभन्दा छिटो यो उपलब्धि हासिल गर्ने खेलाडीको कीर्तिमान बनाए । यसअघि डाइटर मुलरले १२९ खेलमा १०० गोल पूरा गरेका थिए ।
पहिलो हाफ सकिन दुई मिनेटअघि ओलिसेले बायर्नका लागि तेस्रो गोल गरे । ५४औँ मिनेटमा ओलिसेको उत्कृष्ट क्रसमा हेड गर्दै केनले व्यक्तिगत दोस्रो गोल गरे । यससँगै उनले बुन्डेसलिगामा आफ्नो गोल संख्या १०१ पुर्याए ।
७०औँ मिनेटमा पीएसभीबाट यसै सिजन बायर्न आएका सैबारीले गोल गर्दै टोलीको अग्रता ५–० बनाए । त्यसपछि ओलिसेले ७७औँ र ८०औँ मिनेटमा लगातार दुई गोल गर्दै ह्याट्रिक पूरा गरे ।
सन् २०२३ मा बायर्नमा आबद्ध भएयता केनले सबै प्रतियोगितामा १५४ खेलमा १५२ गोल गरिसकेका छन् । गत सिजन उनले ५१ खेलमा ६१ गोल गरेका थिए । जारी सिजन भने सात खेलमा उनको गोल संख्या ६ पुगेको छ ।
युनियन बर्लिनविरुद्ध दुई गोल गरेसँगै केनले उक्त टोलीविरुद्ध सात खेलमा सात गोल गरेका छन् । उनको सबैभन्दा बढी गोल गर्ने विपक्षी भने स्टुटगार्ट हो, जसविरुद्ध उनले सात खेलमा १० गोल गरेका छन् ।
‘१०१ बुन्डेसलिगा गोल पूरा गर्दा मलाई निकै गर्व लागेको छ । यहाँ बिताएको छोटो समयमै मैले हरेक क्षणको आनन्द लिएको छु,’ केनले भने । ‘यी खेलाडीहरूसँग खेल्दा मैले अवसरहरू पाइरहेको छु । खेल संख्याभन्दा गोल बढी हुनु पनि राम्रो तथ्यांक हो ।’
केनको बायर्नसँगको सम्झौता जारी सिजनको अन्त्यमा सकिँदैछ । क्लबमा आफ्नो भविष्यबारे छलफल जारी रहेको बताउँदै उनले आफू बायर्नमा निकै खुसी रहेको बताएका छन् ।
