विश्वकप सेमिफाइनल समीकरण पूरा, फ्रान्स–स्पेन र अर्जेन्टिना–इङ्ल्यान्ड भिड्ने

काठमाडौं । फिफा विश्वकप २०२६ को सेमिफाइनल समीकरण पूरा भएको छ । अन्तिम क्वार्टरफाइनल खेलमा साविक विजेता अर्जेन्टिनाले स्विट्जरल्यान्डलाई अतिरिक्त समयमा ३–१ ले पराजित गरेसँगै विश्वकपको अन्तिम चारमा पुग्ने सबै टोलीको टुंगो लागेको हो ।

यसपटक विश्वकपको सेमिफाइनल निकै रोचक र कडा प्रतिस्पर्धात्मक हुने भएको छ । फिफा विश्व वरीयताको शीर्ष चार स्थानमा रहेका फ्रान्स, स्पेन, अर्जेन्टिना र इङ्ल्यान्डले नै यसपटक सेमिफाइनलमा स्थान सुरक्षित गरेका छन् ।

क्लासिक क्वार्टरफाइनल भिडन्तहरूमा वरीयताको पहिलो स्थानमा रहेको फ्रान्सले मोरक्कोलाई २–० ले पराजित गर्दै अन्तिम चारको यात्रा तय गरेको थियो । यस्तै, स्पेनले बेल्जियमलाई २–१ ले पाखा लगाउँदा इङ्ल्यान्डले नर्वेमाथि २–१ को रोमाञ्चक पुनरागमन जित दर्ता गरेको थियो । अन्तिम क्वार्टरफाइनलमा अर्जेन्टिनाले निर्धारित ९० मिनेटको १–१ को बराबरीपछि अतिरिक्त समयमा दुई गोल थप्दै स्विट्जरल्यान्डको चुनौती समाप्त पारेको हो ।

अब फाइनल प्रवेशका लागि पहिलो सेमिफाइनलमा फ्रान्स र स्पेनबीच महाभिडन्त हुनेछ भने दोस्रो सेमिफाइनलमा अर्जेन्टिना र इङ्ल्यान्ड आमनेसामने हुनेछन् ।