विश्वकपमा मेस्सीको अर्को किर्तिमान : लगातार आठ खेलमा गोल गर्ने पहिलो खेलाडी

काठमाडौं । अर्जेन्टिनाका कप्तान लियोनेल मेस्सीले फिफा विश्वकपमा अर्को ऐतिहासिक कीर्तिमान कायम गरेका छन् । अमेरिकाको मियामीमा भएको फिफा विश्वकप २०२६ को राउन्ड अफ ३२ अन्तर्गत केप भर्डेविरुद्धको खेलमा गोल गर्दै मेस्सी विश्वकप इतिहासमा लगातार आठ खेलमा गोल गर्ने पहिलो खेलाडी बनेका हुन् ।

खेलको २९औं मिनेटमा मेस्सीले गोल गर्दै साविक विजेता अर्जेन्टिनालाई १–० को अग्रता दिलाएका थिए । यससँगै उनको विश्वकपमा व्यक्तिगत गोल संख्या २० पुगेको छ । विश्वकपमा सर्वाधिक गोल गर्ने खेलाडीको सूचीमा उनले आफ्नो कीर्तिमान अझ मजबुत बनाएका छन् ।

तथ्यांक संस्था अप्टाका अनुसार मेस्सी विश्वकपका दुई फरक संस्करणमा सात–सात गोल गर्ने पहिलो फुटबलर पनि बनेका छन् । उनले कतारमा सम्पन्न २०२२ को विश्वकपमा सात गोल गरेका थिए भने जारी २०२६ संस्करणमा पनि सात गोल पूरा गरेका छन् । यससँगै उनी गोल्डेन बुटका प्रमुख दाबेदारमध्ये एक बनेका छन् ।

नकआउट चरणको यो खेलअघि मेस्सी र फ्रान्सका कप्तान किलियन एम्बाप्पे समान ६–६ गोलसहित सर्वाधिक गोलकर्ताको सूचीमा संयुक्त रूपमा अग्रस्थानमा थिए । केप भर्डेविरुद्धको गोलपछि भने मेस्सी एक्लै शीर्ष स्थानमा उक्लिएका छन् ।

पहिलो हाफमा अग्रता लिए पनि अर्जेन्टिनाले त्यसलाई जोगाउन सकेन । दोस्रो हाफको ५९औं मिनेटमा केप भर्डेडेरोय डुआर्टेले बराबरी गोल गर्दै खेल १–१ को अवस्थामा पु¥याए ।

त्यसपछि मेस्सीले लगातार आक्रमण सिर्जना गरे पनि केप भर्डेका अनुभवी गोलरक्षक भोजिन्हाले उत्कृष्ट बचाउ गर्दै टोलीलाई खेलमा टिकाइराखे । निर्धारित ९० मिनेटसम्म दुवै टोलीबाट थप गोल हुन नसकेपछि खेल अतिरिक्त समयमा प्रवेश गरेको थियो ।

यस खेलअघि नै मेस्सीले विश्वकपमा ३०औं खेल खेलेर अर्को कीर्तिमान बनाएका थिए । उनी फिफा विश्वकपमा सर्वाधिक ३० खेल खेल्ने पहिलो फुटबलर बनेका छन् । साविक विश्वविजेता अर्जेन्टिना उपाधि रक्षा गर्ने लक्ष्यसहित मैदानमा छ ।

अतिरिक्त समयको दोस्रो मिनेटमै अर्जेन्टिनाले अग्रता लियो । अर्जेन्टिनाका लागि लिसान्ड्रो मार्टिनेजले अग्रता दिलाए । त्यसको ११ मिनेटपछि सिड्नी लोप्स क्याब्रलले उत्कृष्ट गोल गर्दै केड भर्डेलाई दोस्रोपटक बराबरीमा फर्काए । तर, १११औं मिनेटमा डाइनी बोर्जेसले आत्मघाती गोल गर्दा केप भर्डे पराजित हुन पुग्यो ।

साविक विश्व विजेताविरुद्ध नवप्रवेशी केप भर्डेले उत्कृष्ट प्रदर्शन गरेपनि हारबाट जोगाउन सकेन । केप भर्डेलाई पराजित गर्दै अन्तिम १६ मा पुगेको अर्जेन्टिनाले क्वार्टरफाइनल प्रवेशका लागि इजिप्टसँग खेल्नेछ ।

थप समाचारहरु

बागमती गोल्डकप फाल्गुन १ गतेबाट यु–१९ महिला विश्वकप : अभ्यास खेलमा नेपाल पराजित सातौं बागमती गोल्डकप : आज एपीएफ र संकटा भिड्दै आइसिसी विश्वकप लिग २ : नेदरल्याण्ड्स माथि नेपालको दोस्रो जित मैत्रीपूर्ण क्रिकेट शृङ्खलामा आज नेपाल र राजस्थानसँग प्रतिस्पर्धा गर्दै समूह एच: डेब्युको तयारीमा केप भेर्डे, स्पेन र उरुग्वे