काठमाडौं । सह–आयोजक संयुक्त राज्य अमेरिकाले घरेलु मैदानमा जारी फिफा विश्वकप फुटबल–२०२६ मा प्रभावशाली प्रदर्शन गर्दै विजयी सुरुवात गरेको छ । लस एन्जलसमा शनिबार बिहान सम्पन्न समूह ‘डी’ को आफ्नो पहिलो खेलमा अमेरिकाले दक्षिण अमेरिकी प्रतिद्वन्द्वी पाराग्वेलाई ४–१ को भारी गोलअन्तरले पराजित गरेको हो ।
घरेलु दर्शकको उल्लेख्य उपस्थिति रहेको खेलमा अमेरिकालाई जिताउन फोलारिन बालोगुनले दुई गोल गरे भने जियोभानी रेयनाले एक गोल थपे । अमेरिकाले एक गोल भने उपहारस्वरूप पाएको थियो । पाराग्वेका लागि मौरिसियोले एक सान्त्वना गोल फर्काए ।
खेलको सुरुवातमै पाहुना टोली पाराग्वे दबाबमा परेको थियो । खेलको सातौँ मिनेटमा पाराग्वेका डिफेन्डर डेमियन बोबाडिल्लाले आत्मघाती गोल गरेपछि अमेरिकाले १–० को सुरुवाती अग्रता लियो ।
त्यसपछि आक्रामक बनेको अमेरिकाका लागि खेलको ३१औँ मिनेटमा स्टार स्ट्राइकर फोलारिन बालोगुनले प्रहार गरेको बलले जाली चुमेपछि खेल २–० को स्थितिमा पुग्यो । पहिलो हाफको इन्जुरी समयमा बालोगुनले व्यक्तिगत दोस्रो गोल (ब्रेस) गरेपछि अमेरिका पहिलो हाफमै ३–० को सहज र मजबुत अवस्थामा पुगेको थियो ।
तीन गोलले पछि परेको पाराग्वेले दोस्रो हाफमा खेलमा फर्किने प्रयास गर्यो । खेलको ७१औँ मिनेटमा पाराग्वेका मौरिसियोले गोल गर्दै गोलअन्तर ३–१ मा झारेर खेललाई रोमान्चक मोड दिने सङ्केत गरे ।
तर, खेलको इन्जुरी समयको अन्तिम मिनेटमा अमेरिकाका मिडफिल्डर जियोभानी रेयनाले उत्कृष्ट गोल गरेपछि अमेरिका ४–१ को सानदार जितसहित स्पष्ट ३ अङ्क जोड्न सफल भयो ।
यो सानदार जितसँगै आयोजक अमेरिका ३ अङ्क र बलियो गोलअन्तरका साथ समूह ‘डी’ को शीर्ष स्थानमा उक्लिएको छ । विश्वकपको यस समूह ‘डी’ मा अमेरिका र पाराग्वेसँगै अस्ट्रेलिया र टर्की रहेका छन् ।
थप समाचारहरु
त्रिकोणात्मक एकदिवसीय शृङ्खला: नेपालले भदौ ३१ गते क्यानडासँग खेल्ने
हङकङ सुपर सिक्सेस : अष्ट्रेलियामाथि नेपालको शानदार जित
दोस्रो बागमती प्रदेश लिग फुटबल प्रतियोगिता अन्तर्गत आज दुई खेल हुदैँ
विभिन्न खेल आयोजनाका लागि चेम्बर अफ कमर्सको सहकार्य
चारदेशीय टी–२० आई सिरिज स् नेपालले कतारलाई आठ विकेटले हरायो
खेलमा राजनीति नगर्न र एनपिएलको तयारी गर्न प्रधानमन्त्रीको निर्देशन
