भन्सार प्रकरणमा अर्थमन्त्री वाग्लेमाथि ‘मिडिया ट्रायल’ भएको दाबी, ९ कर्मचारी तानिए, तथ्य पुष्टि गरेर मात्रै समाचार बनाउन आग्रह

काठमाडौं । बजेट घोषणाअघि केही भन्सार नाकाबाट विद्युतीय सवारीसाधनको शङ्कास्पद भन्सार जाँचपास भएको विषयलाई लिएर अर्थमन्त्री डा. स्वर्णिम वाग्लेमाथि मिडिया ट्रायल र चरित्रहत्याको प्रयास भएको दाबी गरिएको छ । अर्थमन्त्रीका स्वकीय उपसचिव तथा जनसम्पर्क सल्लाहकार नवीन ढुङ्गानाले शनिबार एक वक्तव्य जारी गर्दै फैलाइएका अफवाहहरूप्रति गम्भीर आपत्ति जनाएका हुन् ।

सल्लाहकार ढुङ्गानाका अनुसार रसुवागढी नाकामा भन्सार बिन्दुमै नपुगेका सवारीसाधनको जाँचपास गरिएको भनिएको गम्भीर विषयमा अर्थ मन्त्रालयले तत्कालै छानबिन अघि बढाइसकेको छ ।

मन्त्रालयद्वारा गठित छानबिन समितिको प्रारम्भिक सिफारिसका आधारमा जेठ २० गते नै रसुवागढी भन्सार कार्यालयका प्रमुख भन्सार अधिकृतसहित ९ जना कर्मचारीलाई जिम्मेवारीमुक्त गरिएको वक्तव्यमा उल्लेख छ । उनीहरूलाई तत्कालका लागि भन्सार विभागमा तानिएको र घटनाबारे थप अनुसन्धान भइरहेको जनाइएको छ ।

मन्त्रालयले छानबिन प्रक्रियालाई तीव्रता दिइरहेकै अवस्थामा अर्थमन्त्री डा. वाग्ले र मन्त्रालयका उच्च अधिकारीहरूविरुद्ध योजनाबद्ध रूपमा प्रचारबाजी गरिएको सचिवालयको दाबी छ ।

ूसत्यतथ्य छानबिन भइरहेको अवस्थामा समाजमा गलत भाष्य स्थापित गर्ने र भर्खरै सार्वजनिक भएको बजेटलाई विवादमा पार्ने कुत्सित उद्देश्यले अर्थमन्त्रीविरुद्ध मिडिया ट्रायल गरिएको छ, वक्तव्यमा भनिएको छ, यस्ता गतिविधिमा संलग्न केही व्यक्तिविरुद्ध कानुनी प्रक्रिया सुरु भइसकेको र अन्य पक्षविरुद्ध पनि कानुनी उपचार खोजिनेछ ।

सल्लाहकार ढुङ्गानाले अर्थतन्त्र, बजेट र भन्सारजस्ता प्राविधिक एवं संवेदनशील विषयमा समाचार सामग्री तयार गर्दा सम्बन्धित निकाय र अधिकारीहरूसँग तथ्य बुझ्न सञ्चारमाध्यमहरूलाई आग्रह गरेका छन् । बजारमा आउने हचुवा र अपुष्ट हल्लाका पछि नलागी केवल पुष्टि भएका तथ्यका आधारमा मात्रै समाचार प्रकाशन तथा प्रसारण गरिदिन उनले सम्पूर्ण सञ्चारमाध्यम र सरोकारवाला पक्षसँग अपिल गरेका छन् ।

थप समाचारहरु

सरकारको आय व्ययः बजेट खर्च १५ खर्ब २३ अर्ब, आम्दानी १२ खर्ब १९ अर्ब बैंकका केही शाखामा भौतिक क्षति, बैंकिङ प्रणाली सुरक्षित दशैँकालागि सुकिला नोट वितरण आजदेखि सुरु ५० रुपैयाँ दरका ४२ करोड नयाँ नोट छपाइका लागि राष्ट्र बैंकले ग¥यो चीनसँग सम्झौता अर्थमन्त्री वाग्लेको एकसाता : राजस्व वृद्धि र निजी क्षेत्रको मनोबल बढाउन केन्द्रित, मूल्यवृद्धिमा मौन स्वदेशी उद्योगको प्रतिस्पर्धात्मक क्षमता बढाउन अर्थ मन्त्रालयलाई संसदीय समितिको निर्देशन