काठमाडौं । नेपाली कांग्रेसका सांसद रामहरि खतिवडाले भारत र चीनबीच लिपुलेक, लिम्पियाधुरा र कालापानी क्षेत्र हुँदै व्यापारिक मार्ग खोल्ने सहमति विषयमा गम्भीर ध्यानाकर्षण गराउँदै उक्त विवादलाई छिटोभन्दा छिटो कूटनीतिक माध्यमबाट समाधान गर्न सरकारलाई आग्रह गरेका छन् ।
शुक्रबार प्रतिनिधिसभाको बैठकमा बोल्दै सांसद खतिवडाले सो विषयमा सरकार गम्भीर रुपमा लाग्नुपर्ने बताए ।
उनले भने, ‘अहिले भर्खरै चर्चामा आएको छ—लिपुलेक, लिम्पियाधुरा र कालापानीबाट भारत र चीनबीच भएको सम्झौताको विषय हो । यसलाई सरकारले कूटनीतिक माध्यमबाट छिटोभन्दा छिटो समाधान गरोस् ।’
उनले प्रधानमन्त्री केपी शर्मा ओली केही दिनमा चीन र भारत दुवैको भ्रमणमा जान लागेका सन्दर्भमा त्यस भ्रमणको सदुपयोग गर्दै नेपालको धारणा स्पष्ट रूपमा राख्न र समाधान खोज्न अनुरोध गरे ।
‘प्रधानमन्त्रीज्यू चीनको भ्रमण गर्दै हुनुहुन्छ र त्यसपछि भारतको पनि भ्रमण हुँदैछ । भ्रमणको अवसरमा सरकार प्रमुखको हैसियतमा उहाँले दुवै देशका सरकार प्रमुखहरूसँग नेपालको स्पष्ट स्ट्यान राखेर गम्भीरतापूर्वक कुरा गर्न र यो समस्या समाधान होस् भन्ने माग गर्दछु,’ खतिवडाले भने ।
उनले यस्तो संवेदनशील विषयमा सम्पूर्ण नेपाली एक भएर राष्ट्रको पक्षमा उभिनुपर्ने उल्लेख गर्दै पार्टी र जातभन्दा माथि उठेर सरकारलाई साथ दिनुपर्ने धारणा पनि व्यक्त गरे ।
‘यस्तो बेलामा हामी सम्पूर्ण नेपालीहरू कुनै पार्टीको, कुनै जातिको नभई सम्पूर्ण राष्ट्रको तर्फबाट आफ्नो स्वाभिमान र राष्ट्रिय एकताका लागि प्रस्तुत हुनुपर्छ,’उनले भने, ‘र यस्तो कुरामा सरकारलाई दृढतापूर्वक साथ दिनुपर्छ ।’
थप समाचारहरु
विदेशबाट आएका लासहरुको क्षतिपूर्तीमा सरकारले ध्यान जान आवश्यक छ : सांसद खान
भिजिट भिसाबारे धेरै चिन्ता गर्नु पर्दैन : श्याम घिमिरे
ठूला दुई दल मिलेर बनेको स्थिर सरकारले आक्रमक ढंगबाट काम गर्न आवश्यक : मन्त्री खड्का
इम्बोस्ड नम्बर प्लेट जडान नगरे तत्काल जरिवाना र कारवाही नगरिने
काठमाडौं उपत्यकाका तीनवटै जिल्लाका मुख्य–मुख्य क्षेत्रमा कफ्र्यु
नागरिक उन्मुक्ति पार्टी छोडेर नयाँ पार्टी गठन गर्ने रेशम चौधरीले घोषणा
